„Новиот патриотизам подразбира да се обединиме заедно сите и леви и десни, и христијани и муслимани и атеисти, во идејата за една заедничка иднина“, рече претседателот на ВМРО ДПМНЕ, Христијан Мицкоски, на денешното одбележување на Меѓународниот ден на мајчиниот јазик. Мицкоски посочи дека ВМРО-ДПМНЕ се движи со идејата една заедничка Македонија за сите луѓе, каде сите ќе се почитуваат со сите свои желби интереси и потреби.
„Во Гостивар се официјални три јазици: македонскиот, турскиот и албанскиот, што е одлична можност да испратиме порака за обединување. Во Македонија е доволно од поделби. Конечно треба граѓаните да се обединат и да застанат зад вистинските вредности: меѓусебна почит, разбирање и борба против криминалот и корупцијата. Да се бориме заедно за поквалитетно образование, да не бидеме рекордери по број на жртви од короната и се што е денес пораз да го претвориме во победа. Тоа што мајчиниот јазик претставува за нас Македонците, подеднакво нивниот мајчин јазик претставува и за другите заедници кои се застапени во нашата Македонија. И не може да бараме почит, доколку не понудиме почит. Тоа што сакаме да го почитуваат кај нас Македонците, мора да значи да го почитуваме и кај останатите заедници во Македонија. Затоа потребно е да научиме да се слушаме едни со други, да се почитуваме дури и тогаш кога не се согласуваме.“, истакна Мицкоски.
Одговорајќи на новинарско прашање, Мицкоски вели оти порано или подоцна предвремни парламентарни избори ќе има.
„Не очекувам дека оваа власт ќе сака да ги напушти дебелите црвени килими, кожните фотелји и привилегите што ги ужива и дека ќе замине. Но, затоа сме ние опозиција и затоа ја добивме довербата од народот на локалните избори. Порано или подоцна ќе се случат и предвремените парламетарни избори, а потоа следува одговорност за сите погрешни политики во изминатите четири години, рече Мицкоски.
Централната комисија за култура на ВМРО-ДПМНЕ денеска во Гостивар организираше трибина „Мајчиниот јазик е идентитет“ каде покрај претседателот на партијата, Христијан Мицкоски, присуствуваше и градоначалникот на Гостивар, Арбен Таравари.
(Б.Б.)