Лидерот на ВМРО-ДПМНЕ, Христијан Мицкоски, на прес-конференција најави дека до Обвинителството ќе ги испрати сите документи за аферата „Мафија“, кои ги добиле преку свиркачи и дека бараат експресна реакција.
Според него аферата потврдува дека власта е во спрега со мафијата и дека ова не само што има негативно влијание дома, туку се одразува и регионално.
Тој тврди дека има докази за двајцата, како што рече, членови на високи мафијашки структури Јован Вукотиќ и Седат Бекер, кои добиле македонски пасоши со туѓ идентитет.
– Кога пред неколку месеци кажав дека државата е управувана од мафија бев обвинет дека сум престрог во квалификациите. Тогаш имав индиции, денес имам докази дека има тесна поврзаност на мафијата со државата. Државата ја имаат ставено на располагање на тацна на балкански мафијашки структури, власта соработувала со балканските нарко босови, обвинува Мицкоски.
За информациите од МВР дека ВМРО-ДПМНЕ со објавување на информации се обидела да ја саботира акцијата, Мицкоски со став – ако спроведуваат акција нека почнат од себе, а не од полицајци. Да бидеме сериозни криминалот и мафијата тука имаат своја држава. Да не беше брифингот на ВМРО-ДПМНЕ немаше да се разбудат од зимскиот сон. Криминалот е во врвот на власта, сè останато е растурање пердуви и приказни за мали деца.