Дваесет и четиригодишната пациентка од Тетово која почина од Ковид, немала никакво претходно заболување. Tака стои во медицинското досие на Клиникатата за инфективни болести каде што се лекуваше од 28 јуни, кога била донесена во многу тешка состојба.
Токму, тоа дека нема никаква претходни заболувања во анамнезата создава дилема кај инфектолозите, како можело да се случи толку млада и на изглед здрава жена, да почине од компликации од Ковид-19.
„Имаше лесно подобрување во текот на лекувањето, но настана попуштање на срцето и тромб емболија во белите дробови. Изгледаше здрава, немаше вишок на телесна тежина, што создава сомнеж дека можеби стварно имало нешто од претходно.
Ќе разговараме со експертите во МАНУ и на Институтот за имунологија да се види дали може да се направи некое генетско испитување. За нас е дубиоза ова, млада, на изглед здрава жена на 24 години да почине како последица на Ковид-19“, изјави за НОВА, д-р. Милена Стевановиќ директорка на Клиниката за инфективни болести.
д-р.Милена Стевановиќ директорка на Клиниката за инфективни болести
Пациентката била болна една недела пред прием на Клиниката за инфективни болести. Имала покачена температура, изразена малаксаност, кашлица и отежнато дишење. Лекувана е од матичен лекар со инфузиони раствори 4 дена, а поради опстојување на тегобите се јавиле во болницата во Тетово.
Направен е тест за Ковид, добиен е позитивен наод и пациентката е хоспитализирана. Со тешка клиничка слика, ниска сатурација и отежнато дишење е префрлена на Инфективната клиника во Скопје на 28 јуни.
Во тек на лекувањето на клиниката се применети сите можности за лекување, била и на кислородна поддршка, по што се забележа извесно подобрување, велат од клиниката.
„Но краткотрајно, со наредно повторно влошување и клинички знаци на срцева слабост и белодробна тромб емболија. И покрај сите преземени начини за лекување во тесна соработка со кардиолог, пациентката и подлегна на болеста.
За пациентката нема пријавен податок дека имала претходни хронични заболување, но поради сомнеж на лекарите за можни коморбидитети, во следните денови ќе се разговара со семејството за здравствената состојба на починатата пред инфекцијата со Ковид-19“, објаснуваат од клиниката.
Младата жена била кратко време во брак, немала деца и работела како сметководителка. Таа се најде на листата на денешниот Ковид биланс, меѓу осумте починати во последното деноноќие.
