– Многу млади средношколци ги користат социјалните мрежи, особено Фејсбук, а политичките групи не им сметаат, но не се свесни за политичкото влијание на нив, покажува истражувањето на Институтот за социолошки анализи на тема „Влијанието на социјалните медиуми врз политичкото однесување на младите“. Младите сметаат дека се имуни на политичките влијанија и дека можат самите да проценат што ќе прифатат а што не.
Според истражувањето, постои оттуѓеност кај младите, незаинтересираност и недостиг на желба за отворање прашања за „проблемите“ со кои се соочуваат.
„За жал ако длабоко навлезете во тоа што се подразбира под злоупотреба на интернет, 90 отсто од испитаниците подразбираат „лажни профили“…и мислат дека е доволна заштита тоа што знаат како да блокираат некого, како да пријават лажен профил“, вели професорката Емилија Симовска, надополнувајќи дека не се свесни за политичката манипулација од страна на политичките групи чија мисија е остварување на одредено влијание.
Презентирајќи ги резултатите, доцент Бојана Наумовска напоменува дека младите сметаат дека нивните ставови се изградени, цврсти, а членување во било какви политички групи, не е доволен мотив за да им се промени мислењето. Нивните ставови говорат дека социјалните мрежи, средношколците ги користат за комуникација со пријателите, а воедно и за создавање нови пријателства.
Најголемо влијание врз формирање на ставовите на испитаниците има семејството, а за политиката се информираат главно преку телевизиите.
„Влијанието на социјалните медиуми врз политичкото однесување на младите“ е истражување спроведено преку разговори во рамки на фокус-групи и образовни дебати во 6 градови низ Македонија со етнички диверзитет, на вкупно 300 средношколци на возраст помеѓу 16 и 21 година. Во однос на одговорите за нивните вредности, не постојат разлики по етничка припадност или големината на градот.
Професорката Симоновска потенцира дека постои недостиг на едукација на оваа тема.
На прашањето дали користите социјални мрежи- 100% велат да, а истиот процент се однесува на младите кои користат Фејсбук, соопшти доц. Калина Лечевска. Целта- комуникација со пријателите, споделување на интересни информации, како и можноста за запознавање со нови пријатели, додаде доц. Лечевска.
Биљана Секуловска го постави прашањето- Дали ќе се случеа арапската пролет, турсксата револуција Окупирајте го Гези без социјалните мрежи, без социјалните медиуми? Можеби да, но ова е време на електронска демократија, електронска револуција и таа ги диктира општествените текови.