Мигрантската криза, која е измачувачко прашање за цела Европа претставува голем предизвик и за Македонија. И додека во меѓувреме низ медиумите се лицитира со бројки на луѓе, со опасност од тероризам од големиот бран бегалци и слично, утрово на брифинг во Министерството за надворешни работи потенцираа дека Македонија ги следи заклучоците од Советот на ЕУ.
А тоа значи дека низ Македонија ќе транзитираат толку мигранти колку што земјите од ЕУ ќе прифатат, односно во земјава од Грција ќе влезат мигрантите кои имаат легитимни основи за барање азил а кои понатаму ќе поминат кон Србија и Хрватска се до Австрија, Германија и Шведска, најпосакуваните дестинации на мигрантите.
Притоа, како што информираше министерот Никола Попоски, планот на македонските власти воопшто не е за да се затвори границата туку работи на скрининг за легитимни азилобаратели а оградите кои се беа изградени долж границата со Грција е за да се запрат нелегалните минувања, за кои Попоски рече дека за минатата година нема ни официјална бројка.
Во однос на сегашната ситуација со Авганистанците, кои се заглавени во Табановце, Попоски рече дека тоа е резултат на нивното непропуштање во Хрватска, но дека во практика се покажало дека најчесто станува збор за авганистански државјани кои подолг временски период престојувале во Грција, а сега му се приклучиле на бранот бегалци и се упатиле кон Германија.
Сепак и понатаму останува режимот за пропуштање на бегалците од погодени подрачја, Сирија, Ирак и Авганистан но само со детален скрининг. Се очекува понатамошна координација што ќе се случи со лицата што во моментов се заглавени.
Инаку во однос на мигрантската криза на ниво на Европска Унија, клучни се три фази: улогата на Турција, заштитата на надворешните граници на шенген зоната и реадмисијата.
Попоски ја нагласи реадмисијата како клучна работа, бидејќи тоа значи дека оние мигранти кои веќе пристигнале во земјите на ЕУ а се економски мигранти, ќе бидат вратени во матичните земји од каде што потекнуваат.
На ниво на ЕУ и неодамнешната изјава на министерот за надворешни работи на Австрија, Себастијан Курц, дека откако ќе ја достигнат границата од околу 37.000 мигранти, тие ќе ја затворат границата, Попоски појасни дека тоа не значи буквално затворање на истата, односно Австрија ќе дозволи да биде транзитна земја за мигрантите кои ќе патуваат кон Германија, Шведска или друга земја.
Тој беше дециден дека во Македонија нема да се градат бегалски кампови, но дека ќе се следат упатствата на ЕУ. Македонските власти претходно објавија дека е расположена за квота од околу 2.000 мигранти но кои би имале привремен престој со одреден период.