Младински образовен форум (МОФ) денеска упати апел до институциите да го прогласат екстерното тестирање оваа учебна година за пробно, да направат сериозна анализа на пропустите и ефектите и да работат на негово подобрување.
Според анализата на МОФ, екстерното тестирање е спроведено со сериозни технички пропусти, законски недоследности и прекршувања, како и промашувања во поставувањето на целите на екстерното оценување.
„Беше пробиен рокот за објавување на предметите за полагање. Учениците ги дознаа предметите за кои треба да полагаат 4 дена пред полагањето, наместо законски предвидени 7 дена. Дополнително, законот беше прекршен и со одложување на полагањето за неколку часа, па дури и за следниот ден, заради падови на компјутерскиот систем. Ова се коси со законски предвидениот рок за одложување на полагањето од максимум половина час. Ваквите пропусти создадоа тензија и стрес кај учениците, што резултираше со пад на концентрација, замор и страв“, истакна претседателката на Младински образовен форум, Дона Костуранова.
Според Антонио Даниловски од МОФ, учениците и професорите сведочеле за низа технички пропусти при спроведување на екстерното тестирање, кои потоа може сериозно да влијаат врз оценката.
„Забележано беше паѓање на системот за полагање, слики кои не се отвараат на прашањата, прашања кои се повторуваат во тестот, прашања кои не се на мајчин јазик, се поставувале и прашања од лекции кои не им биле предавани на учениците а исто така имало и премногу прашања кои треба да се одговорат за кратко време“, вели Даниловски.
Од МОФ порачаа дека ваквото екстерно оценување може само да ги уплаши професорите и учениците, наспроти зацртаната цел да ја утврди објективноста на оценувањето и наспроти посакуваната цел да го унапреди образовниот процес .
„Наместо подобро знаење за учениците, ваквото есктерно оценување фаворизира средни оценки од професорите за учениците, како би се избегнала веројатноста за големи отстапувања од годишните оценки. Дополнително, се отвора прашањето дали професорот чии ученици објективно се оценети со „доволен“ и „добар“ заслужуваат да бидат наградени или пак неопходно е унпредување на нивната работа со цел учениците да добијат подобро знаење?“, велат оттаму.
Младински образовен форум ги повика Министерството за образование и наука, Бирото за развој на образованието и Државниот испитен центар да го прогласат и третираат ова оценување како пробно, по што инситуциите ќе имаат можност да извршат корекции и унапредување на поставените цели, системот на спроведување и техничките ресурси, со цел да се подобри образовниот процес и да се унапредат знаењата и перформансите кај учениците и професорите.
Денеска министерот за образование и наука, Спиро Ристовски на прес конференција, одговарајќи на новинарско прашање изјави дека очекува родителите и учениците да се обратат до Државниот испитен центар за сите забелешки кои ги имаат за екстерното оценување.
„Сериозно ќе ги разгледаме забелешките и доколку констатираме дека се реални и навистина создале проблем во решавањето на тестовите кај децата можно е истите да бидат предмет на дополнителна анализа. Нашата интенција е догодина тоа да биде многу побрзо и потранспарентно и е една од фазите која ќе биде преземена во насока на корекција на она што беа забелешки од досегашната имплементација на екстерното тестирање“, рече Ристовски и додаде дека ако се констатира дека прашањата не се дел од наставна програма, автоматски може да се дисквалификуваат од вкупниот број на прашања кои се предмет на екстерното тестирање.