Младински образовен форум (МОФ) започна со спроведувањето на петицијата со која бараат екстерното тестирање да се прогласи за пробно.
По вчерашната опомена од страна на Комуналната инспекција на Град Скопје, денеска штандовите на МОФ биле избркани од плоштадот со образложение дека немаат соодветно одобрение.
Според Мила Миливојевиќ од МОФ поради тоа тие морале да се префрлат на улица Македонија, пред гимназиите Јосип Броз Тито и Орце Николов како и во парк.
Таа во изјава за А1он, вели дека на инспекторите им објасниле дека според член 21 од Уставот на РМ „Граѓаните имаат право мирно да се собираат и да изразуваат јавен протест без предходно пријавување и без посебна дозвола. Користењето на ова право може да биде ограничено само во услови на воена и вонредна состојба“.
„Тие не ни го признаа тоа и ни кажаа да дојдеме на улица Македонија бидејќи таа е на територија на Општина Центар, а плоштадот на Град Скопје“, додаде Миливојевиќ.
Оваа реакција од страна на МОФ е заради сериозните пропусти за време на спроведувањето на екстерното тестирање, законските прекршувања и недоследностите.
Петицијата ќе се спроведува во тек на 10 последователни денови, на фреквентни локации на отворен простор во 16 градови во Македонија: Скопје, Тетово, Гостивар, Кичево, Дебар, Струга, Охрид, Ресен, Битола, Велес, Куманово, Кратово, Делчево, Гевгелија, Неготино и Штип.