Ни испраќаат преку откупните пунктови во населените места термин кога да го носиме тутунот, не направија како пациентите во здравството кои имаат мој термин, велат тутунопроизводителите од струмичкото село Костурино.
Тие се заканија со протест доколку вака продолжи проценката на тутунот и ваквиот однос на откупните фирми. Струмичките тутунари велат дека откупувачите си поигруваат со нивниот труд и производство од годинашнава реколта. Се жалат на нереална проценка, и огромни одбитоци.
„Принудени сме веќе да не садиме тутун, Владата треба да преземе нешто, бидејќи ние сме сигурни дека откупувачите ќе ни го земаат тутунот по трета и четврта класа“, вели тутунар од селото Костурино.
„Министерството направи да склучуваме договор само со еден откупувач каде што ќе го носиме тутунот. Мене ми стигна термин денеска да однесам 450 килограми тутун, а останатите 550 да ги предадам во јануари. Но што ќе остане од тутунот до јануари знаејќи ги временските услови, целта е да ни го земат за џабе, вели Стојан од Костурино.
Тутунарите се жалат дека висококвалитетниот тутун кој го имаат, откупувачите им го пресметуваат во трета и четврта класа со цена од 55 до 130 денари. Дел од тутунарите по втор пат го носеле тутунот на откупните пунктови. Им го враќале поради преголема влага.
„На секоја бала тутун од 17 килограми ни одбиваат по 2 килограми, ни одбиваат за песок, за влага и останува по 12 до 13 килограми од бала. Замислете на 1.000 килограми ни одбиваат по 100 килограми исушен тутун, кој ние треба да го береме цел месец, а тоа е еден декар тутун, додаваат револтираните тутунарите.
Во струмичко се очекува родот да тежи околу 3.000 тони тутун, иако надлежните бараа годинешново производство да се намали заради препораките на Светската здравствена организација.