Државната комисија за спречување на корупција (ДКСК) минатата недела испратила забелешки и несогласување со Европската комисија за последниот Извештај за напредокот на Македонија кој констатира дека нема никаков напредок во однос на корупцијата, која останува “широко распространета“.
Забелешките на Антикорупциската комисија до ЕК за Извештајот се однесуваат на две оспорувања: дека тој не е објективен и не ја покажал нејзината вистинска работа.
Антикорупциската комисија беше недостапна за одговори на прашања на НОВА во однос на нивните забелешки до Европската комисија, кои за НОВА ги потврдија и од Канцеларијата на ЕУ во Македонија за НОВА.
Оттаму велат забелешките не можат да бидат објавени во медиумите, бидејќи се на разгледување, но дека ова е прв пат да добијат еден вид “претставка“ за работата на Европската комисија.
Во меѓувреме, претседателот на Државната комисија за спречување криминал, Горан Миленков во краток телефонски разговор со НОВА не сакаше да ги образложи аргументите на Комисијата.
„Извинете не можам да зборувам“, беше одговорот на Миленков пред да ја спушти телефонската слушалка при претставувањето на НОВА, во кој сакавме да ги слушнеме аргументите од првиот човек на Антикорупциска за забелешките на европската институција, односно зошто сметаат дека Извештајот е пристрасен во однос на нивното работење.
Одговор нема и по елетронски пат иако е испратено барање за писмено објаснување веднаш по разговорот со Миленков.
.jpg)
Според политичкиот аналитичар Сашо Ордановски, кој е член на Транспарентност Македонија, токму нефункционирањето на ДКСК придонесува за состојбата во која се наоѓа земјава.
– Мислам дека членовите на Антикорупциска комисија треба да бидат уапсени заради невршење на функцијата. Нивното нефункционирање всушност придонесува за состојбата во која се наоѓаме што по што треба да одговараат по Кривичен законик. Антикорупциска може да реагира и да приговара и за временската прогноза, но тоа е толку неважно тело што мислам дека сериозно и нема да им забележат, вели Ордановски за НОВА.
Претседателката на Транспаренси Интернешнал пак, Слаѓана Тасева вели наместо да се испраќаат преписки до Комисисијата, ДКСК треба да поработи на препораките од Извештајот, кои се основаат на добра аргументација.
– Мислам дека повеќе време и енергија треба да потрошат да одговорат на препораките кои ги содржи Извештајот на Европската комисија. Се она што го содржи Извештајот е добро засновано и аргументирано што мислам дека наместо да наоѓа забелешки, Антикорупциска треба да размисли за својата стратегија. Де факто, состојбите се правилно нотирани во Извештајот и ова е еден од ретките реални извештаи на Европската Комисија според мене, вели Тасева.
Пораките во Извештајот велат дека нема напредок изминатата година за претходно идентификуваните проблеми, а корупцијата останува широко распространета.
– Адресирањето на овие проблеми е нарушено со недоволната политичка волја и политичкото вмешување во работата на релевантните тела, со што им се наштетува на нивната способност да работат активно и неселективно, особено за високопрофилните случаи.
Земјата во следната година особено треба да внимава на: покажување на реална политичка волја во борбата против корупцијата во форма на автономни и ефективни мерки… особено од Државната комисија за спречување корупција, да се зголеми видливоста на анти-коруптивните мерки и постигнатите резултати, да се подобри статистиката во борбата против корупцијата на високо ниво, да се креира ефективна рамка за заштита на „свиркачите (дојавувачите)“ врз база на европските стандарди, се вели во Извештајот.