Незадоволни од денешната, трета по ред средба во МОН, средношколците велат дека ќе побараат Народниот правобранител, но и невладини организации да вршат мониторинг на нивните средби со надлежните, поради стравувањето дека со нив се манипулира.
Денеска тројца претставници на средношколскот пленум се сретнаа со министерот Абдулаќим Адеми и неговиот заменик Спиро Ристоски.
Средношколците велат дека надлежните им предложиле да се формираат работни групи кои ќе ги разгледуваат предлозите за подобрување на концептот на матура и екстерното тестирање во иднина.
Наспроти ова, средношкоцлите велат дека тие се дојдени до конкретни решенија кои претходно ги изработиле нивните работни групи и велат дека не отстапуваат од нивните барања.
-Тие ни понудија работење по модел на работни групи, но ние веќе им доаѓаме со конкретни предлози како може да ги измениме. Ние не сакаме радикално да ги укинеме сите работи, но им нудиме констуктивен предлог за да сите бидеме задоволни. Нашите црвени линии се концептот на државна матура за кој бараме одложување, а на тема екстерно понудивме нов концепт кој подобро би се спровел, анонимно, по принципот на Словенија, изјави по средбата средношколецот Огнен Ханџиски.
-За наредната средба бараме мониторинг од Народен правобранител, детската амбасада Меѓаши и од Хелсиншкиот комитет , бидејќи сметаме дека може да бидеме манипулирани и лесно да потпаднеме под политички влијанија. Сметаме дека на некој начин тактизираат надлежните, но и ние, очекуваме да дојдеме до некое решение, но надежта не е само доволна, вели средношколецот Дејан Рајкоски.
Ова е трет ден ако средношколците 24 часа поминуваат под отворено небо, во Паркот на новинарите наспроти ресорното министерство. Тие денеска добија засилување и од средношколците од Охрид кои со автобуси пристигнаа да ја дадат својата поддршка.
Вечерно време пак, родителите на ученциите кои кампуваат во смени дежураат во паркот, а на безбедноста внимаваат и полициски екипи.
Средношколците се децидни дека не отстапуваат од бојкотот во училиштата и кампувањето пред МОН се додека не се постигне компромис со ресорното министерство, а дотогаш нивните средби со министерот Адеми ќе продолжат.