Руски шпиони ги користеле Француските Алпи како главен камп за операции во цела Европа, објави денеска весникот „Монд“. Според медиумот, 15 припадници на руското воено разузнавање биле активни на континентот од 2014 година, а последен пат преминале преку Франција во септември 2018 година.
Разузнавачките служби на Франција, на Швајцарија и на Велика Британија презеле операции за потрага по руските шпиони. Еден од 15-те агенти бил идентификуван од Британците како член на групата што во март лани изврши напад во Солсбери во кој беше отруен Сергеј Скрипал и неговата ќерка Јулија.
Весникот тврди дека шпионите немале никакви операции во Франција, но неколкупати биле во мали градови како Анмас, Шамони и во Евијан. Тие, според „Монд“, дејствувале во Велика Британија, во Бугарија, во Црна Гора, на Крим и во Молдавија.