Еден од најпознатите слависти и македонисти во светот, академик Виктор Фридман денеска одржа предавање насловено „Јазикот на бомбите како автентичен македонски разговорен јазик. Граматика и лексика“.
Нелегално прислушуваните телефонски разговори кои ги објави опозицијата или тн. „бомби“ за прв пат станаа дел од научно истражување. Познатиот американски лингвист Виктор Фридман денеска во Институтот за македонски јазик „Крсте Петков Мисирков“ одржа презентација на неговото истражување за вокабуларот кој се користи во „бомбите“ со споредби и анализи со делото на Крсте Мисирков, „За македонцките работи“.
Истражувањето е правено строго од лингвистички аспект и во него биле разгледувани 130.000 зборови. За него, бомбите биле ретка можност да се види како функционира неформалниот говор во земјава.
„Во текстот на ‘бомбите’ излегува дека ‘будала’ е во јака конкуренција со ‘идиот’, кој се среќава со истиот број појавувања. Друга модерна заемка ‘морон’ се појавува четири пати, но сепак ‘глуп’ победува со педесет примери“, рече академик д-р Виктор Фридман.
Според него, во говорот најмногу се користеле турцизми но и други стилови на говор. Интересно е што во разговорниот јазик, турцизмите биле многу позастапени од србизмите, кои често се присутни во скопскиот дијалект на кој најмногу беа бомбите.
Професорот истакна дека македонските бомби може да се споредат со најпознатата американска афера на прислушкување – „Вотергејт“, но разликата е што во Македонија може да се слушнат автентично самите разговори.
„Истражувањето е извршено само од лингвистичка гледна точка, без разлика дали материјалите што ги разгледував се вистинити или не. Ова е ретка можност да се собере соодветен материјал што ќе даде релевантни податоци за неформалниот говор во Македонија“, рече Фридман.
Фридман е истакнат професор на општествени науки на Универзитетот во Чикаго. Тој има свој оддел во Одделението за лингвистика и е вонреден професор во Одделот за антропологија. Има објавено бројни статии на англиски, македонски и албански јазик и е академик во МАНУ.
Заради големата научна работа и популаризација на македонскиот јазик има добиено македонски пасош.