Според рускиот шеф на дипломатијата, Сергеј Лавров, случувањата во Македонија се поради намерата на премиерот Никола Груевски да не ги почитува европските санкции против Русија.
– Македонија сепак преговара за влез во ЕУ и Брисел недвосмислено покажува дека Унијата и оние кои сакаат да влезат во неа треба да се обединети во однос на Русија. Тие го “користат албанскиот фактор“, вели Лавров за случувањата во Македонија.
Тој потенцира дека настаните во Македонија биле контролирани однадвор, а сега се зборувало земјава да биде поделена помеѓу Албанија и Бугарија.
– Настаните се грубо контролирани однадвор. Официјално Груевски е обвинуван дека не си ги извршува обврските кон општеството и дека ја злоупотребува власта, но зад ова тврдење се крие одбивањето на македонската влада да ги поддржи санкциите на ЕУ против Русија и поради „Јужен поток“, како и подготвеноста на Скопје да учествува во „Турскиот поток“. Тоа е многу тажно и опасно, бидејќи се прави обид да се активира албанскиот фактор. Пред извесно време, т.с. во 2001 година беше потпишан Охридскиот договор, кој имаше сериозни контроверзии. Сега се покренува темата, дека Македонија треба да се федерализира и дури се изразила идејата за територијална поделба, да се подели земјата на Албанија и Бугарија, изјавил Лавров.
Од друга страна рускиот претставник во ОБСЕ, Андреј Кели смета дека случувањата во Македонија може да се претворат во сериозен конфликт.
– Со оглед на недостатокот на напредок меѓу главните политички партии во Македонија, не се гледа кога ќе дојде крајот на кризата и се плашиме дека кризата може да се претвори во сериозен конфликт, изјавил Кели.
А на изјавите на Лавров, се огласи и министерот за надворешни работи на Бугарија, Даниел Митов, кој рече дека изјавата на рускиот министер за надворешни работи е крајно неодговорна.
„Обидите да го стави под сомнение европскиот поредок во регионот и територијалниот интегритет на Република Македонија се неприфатливи. Стабилноста на сите земји од Југоисточна Европа е од огромно значење за нас и обидите на надворешните фактори за регионот на земјите за нејзиното поткопување преку слични сугестии треба да бидат прекинати. Бугарија ќе продолжи да биде гарант за независноста и територијалниот интегритет на Република Македонија и во тоа не може да има никакво сомневање“, рече Митов.
За него, нрајно неодговорни се изјавите на рускиот министер за надворешни работи Сергеј Лавров во неговото обраќање пред Советот на федерацијата на Федералното собрание на Руската Федерација, дека се зборувало поделбата на Република Македонија помеѓу Албанија и Бугарија.
Тој истакнува дека токму Бугарија била еден од најголемите поддржувачи на Македонија додека се градела државата.
Митов истакнува дека Бугарија е државата која прва го призна уставното име на Република Македонија и тоа решение според него било клучно за стабилноста во Југоисточна Европа.
НОВА побара реакција од македонското МНР, но оттаму засега се недостапни за коментар на изјавите на Лавров.