Учество на малолетници на митинзите на политичките партии, злоупотреба на државни ресурси (возила на јавни претпријатија во Облешево, Охрид, Струга, Битола, Демир Хисар…) и партиски знамиња на бандерите, се дел од нерегуларностите кои МОСТ ги забележала на терен за време на предизборната кампања на кандидатите за претседател.
Во интервју за НОВА, извршниот директор на Граѓанската асоцијација МОСТ, Дарко Алексов како генерален заклучок од кампањите посочува дека за разлика од минатото, претседателските кандидати преферирале директни средби со граѓаните, а не големи митинзи.
Во однос на избирачкиот список, кој го следат низа контроверзии по одбиените барања на некои политички партии од Државната изборна комисија, за отстранување на таканаречените „фантомски гласачи“, Алексов тврди дека прашањето за регуларноста на листата на гласачи е прашање кое се третира само пред избори.
– Она што ние го следиме во сите години наназад, е дека избирачкиот список е причина за меѓусебни обвинувања, само во предизборието. Никогаш во неизборна година политичките партии не дошле до консензус, истиот да биде прочистен, вели Алексов.
Граѓанската асоцијација МОСТ, во недела за претседателските избори има ангажирано вкупно 580 набљудувачи на 580 избирачки места, со 84 мобилни тимови, кои ќе вршат мониторинг и на местата кои нема да ги опфатат целодневно.
Своите видувања за тоа дали изборите се спроведуваат во фер и демократска атмосфера, Дарко Алексов потенцира дека ќе ги презентираат наредниот ден по завршувањето на изборите.