Спасувачките служби во Џенова денес попладне извадија урнатините уште тело на еден 30 годишен човек, жртва на мостот Морандини што се урна во овој италијански град, јавија италијанските медиуми.
Оваа жртва е последната од луѓето што се водеа како исчезнати по уривањето на мостот. Со ова билансот на жртвите се искачи на 42.
Раководството на “Аутостраде пер Италија”, фирмата што беше задолжена за одржување на мостот, најави попладнево, дека од понеделник ќе даде 500 милиони евра за реконструкција на мостот и како помош за градот Џенова за чија економија и пристаниште овој мост беше виталната клучка.

Според директорите Џовани Кастелучи и Фабио Черчиаи, еден милион ќе им биде даден на семејствата на загинатите и десетина милиони за сместување на лицата што живееле под мостот и кои повеќе не можат да се вратат во нивните домови.
Кастелучи исто така рече дека има проект според кој во рок од 8 месеци може да се направи нов мост од челик. Во меѓувреме “Аутостраде пер Италија”, која одржува 6000 км автопатишта низ земјата, вети дека ќе опреми во “рекордно време” алтернативен пат за камионите кои минуваат низ Џенова на пат кон северна Европа. Истовремено автопатиштата во овој регион повеќе нема да се наплатуваат.

Раководството на фирмата тврдеше денес на прес конференција дека, според сите експерти што го прегледувале мостот, тој бил безбеден:
-Мостот беше посебен но сите што го прегледаа изјавија дека е безбеден. Нешто се случило и правдата треба да каже што, рече Кастелучи.
“Аутостраде пер Италија” беше нападната од политичарите на новата италијанска влада, коалиција на популистите од 5 ѕвезди и екстремното десната Лига, како одговорна за несреќата. Италијанската влада ги повика директорите на фирмата да дадат оставки но тие денес прецизираа дека засега остануваат на нивните работни места.
Ден на жалост во Италија

Денес во текот на денот се одржа национален погреб на 18 жртви од урнатиот мост во големиот хол на Салата за изложби во Џенова. На испраќањето на жртвите присуствуваа повеќе политичари помеѓу кои и претседателот на државата Серџо Матарела и премиерот Џузепе Конте а илјадници жители на Џенова дојдоа да им искажат последна почит на загинатите.
Сепак, половината од семејствата на загинатите одлучија да не учествуваат на церемонијата. Нивната одлука да направат приватен погреб е главно мотивирана од лутината врз политичарите и претпријатието задолжено за одржување на мостот.
Во Италија денес е прогласен Ден на жалост. Погребната церемонија беше пренесувана во живо на Радио и телевизија на Италија (РАИ).
Надвозникот Моранди, дел од автопатот А10, се урна во вторникот. Бетонскиот мост Моранди е изграден во 1967 година, висок е 90 метри и долг малку повеќе од еден километар. Најдолгото растојание меѓу два столба е 200 метри. Целиот мост бил реконструиран во 2016 година.




