Од денеска може да се поминува преку пешачкиот мост „Око“ и да се видат 30 тината скулптури на антички и средновековни кралеви, кнезови, и војсководци. Сепак, околу темелите на мостот се уште има скелиња.
Мостот „Око”, во моментов е „слепа улица“ бидејќи од Кејот води до влезот на новиот Археолошки музеј, кој се уште се гради.
Од општина Центар за НОВА велат дека мостот „Око“ не е пуштен во употреба и се наоѓа во истата состојба како и „Мостот на уметноста“. Пешаците може да се движат по мостот, но, за официјалното отворање ќе се чека да се изгради партерот на зградата на Археолошкиот музеј.
„Темпото на изградабата и тоа кога овој мост ќе биде пуштен во употреба го одредува исклучиво Службата за заеднички и општи работи на Владата“, информираат од Центар
Откако хрватската градежна фирма „Конструктор“ го доби тендерот за изградба на мостот и го пролонгираше рокот, а во меѓувреме се најде под лупата на хрватските истражни органи заради сомневање за вмешаност во финансиски криминал, договорот со оваа фирма беше раскинат.
Во 2012 година општина Центар ја избра градежната компанија „Бетон“ од Скопје за довршување на изградбата на „Око“, кој треба да го поврзе Кејот „13 ноември“ со Археолошкиот музеј.
Договорот бил потпишан на крајот од декември 2012, Центар го додели проектот на македонскиот градежен гигант во постапка со преговарање без јавно објавување на оглас.
Вредноста на склучениот договор изнесува околу 1.250.000 евра.
Во меѓувреме, српската леарница „Јеремиќ“ ги изработи скулптурите што се поставени на мостот. Се работи за 29 бронзени скулптури на благородници, антички и пајонски кралеви, кнезови и други ликови, чија висина изнесува по два метри. Меѓу нив се: Митскиот крал Каран, Пердика I, Аминта III, Парменион, еден од генералите во војската на Филип, Авдолеон, Филип V, Персеј, Тит Флавиј Орест, Јулија Тертила Публиј Септиј Николај, Будиј и други личности од античката историја. Другите скулптури се од византискиот период и од раниот среден век.
Според податоци од Бирото за јавни набавки, скулптурите на мостот „Око“ чинат 170 илјади евра.
Според отчетот на Министерството за култура, автор на поголемиот број од скулптурите на „Око“ е Валентина Стефановска.
Изградбата на мостот започна во септември 2009 година, врз основа на идејното решение на Борислав Јосифов и на Коста Мангаровски.