Мострите од мачките за кои постои основано сомнение дека се заболени од беснило, за целосна верификација, Агенцијата за храна и ветеринарство ќе ги испрати во референтната лабораторија на Европската унија во Нанси – Франција на дополнително испитување и финално потврдување на присуството на вирусот на беснило.
Резултатите се очекуваат за 6-7 дена.
Во меѓувреме, Агенцијата за храна и ветеринарство ќе продолжи со задолжителната вакцинација на домашните миленици (кучиња и мачки) против беснило.
Што се однесува до бездомните животни, општините, односно Градот Скопје продолжуваат со заловување на уличните кучиња и мачки. Заловените кучиња и мачки од реонот на Радишани, ставени се под 15 дневен надзор на стручни лица.
Вчера Агенцијата за храна и ветеринарство информираше дека 35-годишен човек од скопската населба Радишани во понеделникот бил каснат од мачка за која е потврдено дека има беснило.
Во истовреме невладината Анима Мунди побара демант од Агенцијата за ветеринарство бидејќи резултатите од лабораторијата на Ветеринарен, според нив биле нереферентни.