Марк Маркез ја прослави втората победа во низа во Мото ГП шампионатот, негова петта во сезоната, за зацврстување на лидерската позиција во генералниот пласман. Шпанскиот мотоциклист победи за ГН на Арагон (42:06,816 минути) и покрај грешката на 15 круга пред крајот што го чинеше излетување од патеката и пад на четвртото место. Но, возачот на Хонда покажа неверојатна упорност. Наскоро по кикот го претекна Валентино Роси за избивање на второто место, а со трпелив однос во завршницата го мина и Андреа Довициозо за враќање во улога на предводник на трката што не дозволи повеќе да му биде одземена.
За Маркез ова е вкупно 34 триумф во кариерата во Мото ГП шампионатите, трет на домашен терен. Второто место во Арагон го освои Дани Педроса (+0,879 сек.), трет беше Хорхе Лоренцо (+2,028 сек.), четврти Марк Вињалес (+5,256 сек.), а како петти низ стартно-целната линија мина Роси (+5,882 сек.).
Маркез е лидер во севкупниот редослед со 224 бода пред Довициозо со 208 и Вињалес со 196. До крај на сезоната преостануваат уште четири трки, првата наредна е за ГН на Јапонија на 15 октомври.
Најбрз во Мото 2 класата во Арагон беше Италијанецот Франко Морбидели (40:09,904 минути) пред сонародникот Матија Пасини (+0,145 сек.) и Португалецот Мигел Оливеира (+0,577 сек.). Морбидели е прв во генералниот пласман во конкуренцијата со 248 бода, Швајцарецот Томас Лути е втор со 227 бода и Оливеира со 157 бода.
Шпанецот Жоан Мир, пак, триумфира во Мото 3 класата со време 25:57,607 минути, а место на подиумот обезбедија и Италијанците Фабио ди Џанантонио (0,043 сек.) и Енеа Бастијанини (+0,051 сек.).