Вчера околу 18 часот на крстосницата на булеварите Климент Охридски и Димитрие Чупоски во центарот на Скопје, во близина на студентскиот дом Кузман Јосифовски – Питу, полицајци со полициска кола удриле во мотоциклист.
Очевидците со кои НОВА ТВ разговараше велат дека мотоциклистот поминал на зелено светло, додека пак полициското возило на недозволено место свртиле лево. Тие исто така велат дека во моментот на несреќата на возилото немало ротациони светла, но веднаш штом застанале полицајците ги уклучиле светлата и се обиделе да симулираат дека се на работна задача.
Според очевидците ударот бил страшен и мотоциклистот одлетал неколку метри од местото на несреќата.
Младиот скопјанец Д.С. кој е во триесеттите години веднаш бил пренесен во Ургентен центар каде му била направена операција на главата. Според болнички извори, повредениот се уште е во кома и тој се наоѓа во животна опасност.
Вчера НОВА ТВ побара информации од СВР Скопје, од каде го потврдија настанот, но не дадоа никакви други информации, освен дека на местото на несреќата биле излезени јавен обвинител и Внатрешната контрола на МВР:
Во сите случаи во кои службено лице е инволвирано во сообраќајни несреќи, според протокол излегува и внатрешна контрола.