На утрешната владина седница се очекува да бидат разгледани нацрт амандманите на Уставот, во кои ќе бидат инкорпорирани и предлозите на новата пратеничка група на ВМРО ДПМНЕ – со која вечерва премиерот Заев имаше втора средба во Собранието.
„Зборувавме за суштината и сега останува наше повлекување во Владата, да ги скицираме нацрт амандманите кои што ќе бидат уште еднаш предложени на консултации за до крајот на денот да бидат потврдени од новата пратеничка група и текстот на нацрт амандманите да биде утврден на утрешната владина седница“ рече Заев по средбата.
Тој напомена дека секој пратеник има право да предложи амандмани на нацрт амандманите.
„Остануваме отворени за се што е во духот на Договорот за да го направиме инклузивен овој процес и да обезбедиме поголема согласност во македонскиот парламент за заедно да застанеме зад заокружување на договорот од Преспа. Верувам дека имаме фер и праведен договор и времето ке потврди дека сме на вистинската страна“ додаде Заев.
Крсто Мукоски кој е член на новата Независна пратеничка група на ВМРО ДПМНЕ рече дека на средбата со Заев го усогласиле текстот на нацрт амандманите кои ке бидат инкорпорирани во Уставот.
„Добивме уште еднаш согласност од премиерот дека имаат разбирање за нашите амандмани и дека ке бидат прифатени. Владата утре има состанок наутро, по што новата пратеничка група ке излезе со текстот на амандманите – нашите нацрт амандмани што ги предложивме се однесуваат на зајакнување на македонскиот идентитет, на македонското културно и историско наследство и на македонскиот јазик, вториот амандман се однесува на обезбедување на гаранции за спроведување на целиот договор, односно нестапување на сила на уставните измнеи ако Грција не го ратификува Договорот во својот парламент и не го ратификува протоколот за влезот во НАТО и третиот амандман се однесуваше за внатрешната употреба на името – со нашиот предлог се предлага сукцесивна примена на новото име односно со отворање и затворање на поглавјата за кои треба да преговараме за влез во ЕУ на тој начин ке биде и преименувано името“ рече Мукоски.
Собраниското тело за помирување ќе почне со работа од понеделник.
За барањето на ДУИ во амандманите да биде содржан и Рамковниот договор, премиерот рече дека сеуште не одлучиле дали Охридскиот договор ќе биде дел од Преамбулата.