Министерството за внатрешни работи тврди дека дел од лицата на снимките коишто вчера ги презентираше опозициската СДСМ и со кои ја обвини власта дека подготвува изборен фалсификат, биле државјани на Турција, а не на Албанија.
На улицата „Народен фронт“, адреса за којашто од СДСМ тврдат дека биле сместени лица од Мала Преспа за да гласаат на изборите, службеници на Министерството за внатрешни работи затекнала двајца турски државјани кои студирале во Македонија и кои имале валидни дозволи за привремен престој во земјава.
Турските студенти пристигнале во Македонија преку агенција за посредување при школување „Анадолу Едјукејшн“ лоцирана до амбасадата на Република Италија во Скопје.
Според она што го кажале студентите од Турција, пред два дена на врата им заѕвониле непознати маж и жена и им дале пропаганден материјал на СДСМ и кандидатот Андреј Жерновски. Бидејќи не разбирале македонски, го скинале материјалот и го фрлиле во ѓубре
Истиот ден околу 22 часот на врата повторно им се појавиле две лица кои без одобрение почнале да ги снимаат и да им поставуваат прашања што студентите не ги разбирале доволно, по што лицата си заминале.
„Министерството за внатрешни работи заедно со снимките ќе ја извести турската амбасада во земјава и заради добрите и пријателски врски ќе им понуди помош во идентификување на лицата, доколку злоупотребените турски државјани одлучат да покренат постапка и да бараат надомест на штета.
– Исто така, за манипулацијата пласирана преку некои медиуми ќе бидат известени претставниците на набљудувачките мисии. Иако од осомничениот во случајот со двојните лични карти во Охрид, беше посочено дека токму во средата требало да биде обелоденето сценариото за делегитимирањето на изборите, МВР апелира учесниците во изборниот процес да се придржуваат до етичкиот кодекс“, соопштуваат од МВР.
Во истовреме на прес конференција, членот на Извршниот одбор на ВМРО – ДПМНЕ, Илија Димовски констатираше дека СДСМ прави обид за удар врз легитимниот изборен процес во Република Македонија.
„СДСМ прави груба манипулација со селективните информации за избирачкиот список“, изјави Димовски.
СДСМ: 345 фантом гласачи на Избирачкиот список
Вчера најголемата опозициска партија СДСМ обвини дека во Скопје има лица од Мала Преспа, дојдени во земјата за да гласаат на изборите, а пријавени наводно биле и по 60 лица на иста адреса.
Според СДСМ ова не бил единствениот ваков случај и се работи за лица кои не фигурирале досега на ниту еден Избирачкиот список.