Активистот Замир Мехмети кој е редовен учесник на Шарената револуција очекува во секој момент да добие повик за распит во полициска станица. Полициски службеници го побарале во неговиот дом вчера, но бидејќи немало никој дома, од полицијата навестиле дека денеска ќе добие покана.
-Добив информација од адвокатот на други две демонстрантки, кој ќе биде и мој застапник дека уште од вчера ме барале, но немаше никој дома. Денеска е дома мајка ми, така да очекувам дека ќе ја достават поканата за распит. Јас и претходно кажав дека не бегам јас од тоа, ниту се кријам од некого, во моментот кога ќе добијам покана ќе се појавам во станица, изјави Мехмети за НОВА.
Пред само два дена, Мехмети во говор пред Собранието упати директна порака до министерот за внатрешни Митко Чавков.
-Господине Чавков ќе ви се обратам вас директно, бидејќи вас ве реизбраа за да не уплашите. Ќе ви кажам дека нема плашење, дека овој народ е разбуден и дека ќе ви шараме сè по список, не ви се плашиме. Ние шараме сред бел ден, не се криеме кукавички како вас, рече Мехмети.
Денеска во полициска станица Беко на распит беа повикани четири демонстрантки поради сторен прекршок за време на протестите на Шарената револуција.
Директорката на Хелсиншкиот комитет за човекови права Уранија Пировска и професорката Мирјана Најчевска казнети се со 50 евра парична казна или општо корисна работа. Останатите две демонстрантки Ана Кркуљ и Ирена Штеријовска беа повикани со образложение дека сториле повеќе кривични дела за време на протестите на Шарената револуција врз основа на снимките направени од полициски службеници во цивилка, за што адвокатот Ѕвонко Давидовиќ како нивен застапник вели дека доколку тоа се искористи како доказ, тие ќе поднесат кривична пријава против министерот Чавков, командирот и инспекторите, поради злоупотреба на службената положба.
-По Законот за јавна чистота никогаш нашите клиенти не биле сопрени од униформиран полициски службеник, нивните цивилки не вредат ништо по закон и ако не е легитимирано од униформиран службеник или комунален инспектор, прекршокот не е констатиран. Полицијата тоа го разбра и платните налози не ги издаде. Фотографиите не може да се користат како докази, затоа што наредба за посебни истражни мерки за вакви кривични дела нема, а она што го користи полицијата не е валиден доказ, затоа што е неовластено снимање.
Укажавме дека доколку ги применат фотографиите како докази ќе им поднесеме кривични пријави за злоупотреба на службена положба против министерот, директорот, командирот и инспекторите. Не може да докажат дека на тоа место во тоа време е извршен прекршокот. Едноставно се разделивме без никаков записник, вели Давидовиќ.
Повикувањето на демонстрантите на распит поради учество и прекршоци сторени на протестите, се случува во повеќе наврати од почетокот на Шарената револуција.
Претходно и професорот Гордан Калајџиев беше казнет со 50 евра поради фрлање на боја за време на протест. Досега на тројца демонстранти им се изречени условни казни, додека на двајца – Здравко Савевски и Владимир Куновски осомничени за демолирање на Народната канцеларија на Иванов закажено е судење на 31. мај, а тие се во куќен притвор и не го признаваат делото.