До сега до Министерството за внатрешни работи нема стигнато наредба од Судот за приведување, односно распишување на национална или меѓународна потерница за гинекологот Николче Дамчевски, тврдат во МВР. Од таму потврдуваат дека од средина на минатата година тој е во системот на патници кои имаат забрана за излез од Македонија.
„Што се однесува до другото прашање, ве известуваме дека по добиено известување од судот за изречена судска забрана за излез на Николче Дамчевски од Република Македонија, на 26.7.2017 тој е внесен системот за контрола на патници со мерка „забрана за излез од Република Македонија“, одговорија во МВР.
Но, од МВР нема ниту збор за упатниот акт за издржување на казна затвор кој уште на 14.11.2018 година е испратен до МВР, кога е побарано да се утврди неговата достапност, како што потврдија од Основен суд 1, и дека до овој момент Судијата за извршување на санкции нема никаков одговор од МВР.
Во меѓувреме, стигна и официјален, писмен одговор од Медицинскиот центар “Мајчин дом”, за деталите во однос на мерките кои се преземени по објавените информации дека гинеколог кој е осуден на две години казна затвор во Македонија е дел од нивниот тим, работи и прегледува пациентки.
Од таму потенцираат дека раководството на Медицинскиот центар „Мајчин дом“ во Софија се обратил до бугарската Агенција за медицинска ревизија при Министерството за здравство, за да изврши проверка на податоците на гинекологот Николче Дамчевски, кој има извршна казна затвор од две години од Апелацискиот суд во Скопје.
Раководството на Медицинскиот центар “Мајчин дом” изразува подготвеност да покаже целосна соработка со истражните и контролни органи во врска со разјаснувањето на околностите на случајот, велат од таму.
„Д-р Дамчевски има бугарско државјанство и завршил медицинско образование и постдипломски студии во Бугарија. Тој не е вработен во „Мајчин дом “и нема работен однос ниту со болницата, ниту со Медицинскиот центар. Активноста која ја остварува е основана на граѓански договор кон медицинскиот центар и при за склучување на договорот се исполнети сите правни и административни процедури. Д-р Дамчевски има обезбедено сите документи од бугарското законодавство за вршење на лекарска дејност – диплома за високо медицинско образование, потврда за специјализација по акушерство и гинекологија и сертификат за членство во Бугарскиот лекарски сојуз од месец август 2018 година. Врз основа на овие документи тој добил регистрација и право за извршување на амбулантско медицинска помош од регионалната Здравствена инспекција“, се вели во сооштението од Медицинскиот центар“ Мајчин дом“.
Претходно, од Медицинскиот центар „Мајчин дом“, за НОВА потврдија дека Дамчевски од денеска не работи веќе таму откако било интервенирано од Министерството за здравство на Бугарија и дека во моментот се испитува случајот.
Дамчевски од денеска е избришан и од веб страната на Медицинскиот центар„Мајчин дом“ во Софија. Осудениот гинеколог го нема повеќе меѓу лекарите специјалисти кај кои може да се закаже терми, а кога ќе отворите на линкот не се појавува неговата фотографија заедно со биографијата.
Како што веќе објави НОВА, Николче Дамчевски, гинекологот кој девет месеци лажеше пациентка дека е бремена избегал од Македонија. Наместо да оди на издржување на казна затвор во траење од две години, пресуда која е извршна, тој им избегал на македонските правосудни органи. Освен казната затвор која Апелациониот суд ја потврди и ја зголеми од 1, 6 месеци на 2 години, Дамчевски има и забрана за вршење на дејност во траење од 8 години.
Додека македонските правосудни органи и МВР се уште проверуваа каде е, НОВА го пронајде во Бугарија каде слободно работи како гинеколог во државниот Медицински центар „Мајчин дом“, закажува термини, прегледува и лекува пациентки.
Според пресудата, гинекологот Дамчевски е виновен за Тешки дела против здравјето на луѓето и фалсификување исправа. Тој пред судот ја призна вината и за двете дела, Несовесно лекување и Фалсификување на медицински документи.
–