По објавените снимки од инцидентите во Радишани кои со јавноста ги сподели семејството чии членови учествувале во тепачката во неделата вечерта, министерството за внатрешни работи се огласи со соопштение каде што тврди дека случајот се расчистува и дека истиот не е поврзан со изборни нерегуларности.
„Во врска со пишувањето на одредени портали околу случајот во Радишани и негово поврзување со изборниот процес, МВР сака да потсети дека нема регистрирано, ниту пријавено какви било нерегуларности на избирачките места на посочената локација кои би влијаеле на гласањето.
-Инволвираните во случајот се идентификувани, а пронајдено е и лицето кое го управувало возилото и во консултација со надлежниот Јавниот обвинител, против него ќе биде процесуирана пријава за сторено кривично дело „Предизвикување на општа опасност“. Кај сите останати за кои надлежниот јавен обвинител ќе утврди натамошна одговорност ќе следуваат соодветни поднесоци.
-Како што веќе информиравме, на 13.04.2014 година, околу 22,30 часот, на ул. „Радишанска“ во Скопје пред куќата на Ш.З.(74) настанала расправија, а потоа и тепачка помеѓу Б.З.(20) и Б.З.(23) од една страна и од друга страна Н.Б.(23) и Б.Д.(34), во која си размениле некоку удари по телото нанесувајќи си видливи повреди, додека на Б.З. му е нанесена скршеница вопределот на раката. По ова, од куќата излегла Ш.З. да види што се случува, по што А.Д.(1988) со патничко возило влегол во толпата, удирајќи ја при што и нанел телесни повреди. Се преземаат мерки за расчистување на случајот“, соопштува МВР.
Во понеделникот министерката Јанкуловска изјави дека тепачката во Радишани се случила поради сообраќајна несреќа. НОВА денеска ја пренесе верзијата на семејството кое тврди дека тепачката настанала поради провокации пред нивниот дом за време на славење изборна победа, откако група млади почнале да извикуваат „Шиптари селете се од Радишани“ и „Шиптари зошто не гласавте“. НОВА во своите текстови го пренесе впечатокот на инволвираните дека причина за инцидентот биле вулгарни прозивки со етнички предзнак, а не изборни нерегуларности.