Ниту еден од повредените патници во автобусот со македонски регистарски таблички што утрово се преврте на патот Блаце – Прокупље во Србија не е во животно загрозувачка состојба, објави Министерството за здравство (МЗ).
„Згрижените пациенти се надвор од животна опасност. Засега се сите контактибилни, но за секој случај во болницата во Прокупље се врши и компјутерска томографија за да се утврди прецизно состојбата на повредените“, е наведено во дописот од МЗ.
Според Министерството за внатрешни работи (МВР), билансот од сообраќајната несреќа е 26 повредени лица од кои 18 се згрижени во Домот за здравје во Блаце додека останатите осум се пренесени во болницата во Прокупље.
Српска „Политика“, пак, јавува дека најтешко повредено во несреќата е женско лице кое е транспортирано во Клиничкиот центар во Ниш.
Македонските патници утрово тргнале на еднодневен излет на Копаоник, но, неофицијално, како што јавуваат српските медиуми, поради лошата состојба на патот и неприлагодена брзина, автобусот се превртел кај местото Белољин на патот Прокупље – Блаце.