Откупот на тутунот од реколтата 2018 година е при крај и досега се откупени 90 отсто од договорените количини. Од Министерството за земјоделство информираат дека заклучно со 22 февруари откупени се околу 25 милиони килограми со просечна цена од 241,34 денари по килограм. Од страна на откупните претпријатија досега на тутунопроизводителите се исплатени над пет милијарди денари, односно, 96 проценти од откупените количини тутун.
Во годинашната реколта се засеани 14.802 хектари со тутун, а склучени се 34.104 договори со девет откупни претпријатија. Вкупната договорена количина за откуп изнесува над 29 илјади тони тутун, а откупот завршува на 15 март. Од ресорното Министерство информираат дека подрачните единици пријавиле 23.430 издадени евидентни листови што споредено со реколтата во 2017 година изнесува зголемување за 57 евидентни листови и се склучени над 4.700 повеќе договори.
„За зголемениот интерес големо влијание имаше високата откупна цена на тутунот од реколтата во 2017 година што изнесуваше 217,60 денари за килограм, како и новиот модел на зголемени субвенции според кој за прва класа е 80 денари за килограм, за втора класа е 70 денари и 60 денари за трета класа и дополнителните класи“, велат од ресорното Министерство.
Оттаму додаваат дека новата производствена реколта ќе стартува според постоечкиот Закон за тутун и тутунски производи и оти и годинава ќе се издаваат евидентните листови, односно, т.н „бели картони“.
Овие евиденти листови ќе бидат укинати со новиот Закон за тутун, производи од тутун и сродни производи кој е во собраниска процедура. Укинувањето ќе биде од 2020 година со што ќе се намалат административните процедури и тутунарите ќе склучуваат договори директно со откупните претпријатија. Со новиот Закон за тутун се предлагаат и одредби за уредување на сродните тутунски производи и тоа несогорливи производи од тутун, електронски цигари и растителни (билни) производи за пушење. Одредбите од законот кои се однесуваат на поимите дефинирани за несогорлив тутун и електронска цигара ќе бидат употребени за определување на надоместок согласно Законот за акцизите од 1 јули во 2019 година.