За прв пат по 23 години и со авионски карго транспорт, вчера се реализира извоз на свежо разладено македонско јагнешко месо во Јордан, се наведува во објавата на Фејсбук налогот на Министерството за земјоделствот, шумарство и водостопанство (МЗШВ).
„Околу 2.000 јагниња, откупени од домашните одгледувачи на овци, со авионски транспорт вчера доцна попладне се извезоа во Јордан. Овој извоз го најавивме уште пред два месеци, барајќи алтернативни пазари за извоз на јагнето и за решавање на кризата за извозот поради пандемијата од вирусот ковид-19. Целта ја остваривме, околу 30 тони свежо разладено македонско јагне замина на пазарот во Јордан“, истакнуваат од МЗШВ.
Од таму посочуваат дека МЗШВ и Агенцијата за храна и ветеринарство од почетокот на извозот беа во постојана комуникација со амбасадите, со откупувачите и со одгледувачите за обезбедување на пазари за македонското јагне.
„Поради кризната ситуација, а во насока на помош на одгледувачите на овци за покривање на загубите на поради намалениот извоз на јагниња, ја зголемивме вкупната финансиска поддршка за женско јагне на 2.500 денари по грло“, потенцираат од МЗШВ.