Средношколците од Скопје в среда излегуваат на втор марш за укинување на екстерното тестирање и враќање на стариот концепт на полагање државна матура.
Од средношколскиот пленум навестуваат креативен марш на Денот на шегата. Имено, дел од средношколци кои ќе маршираат од Собранието на Република Македонија до министерството за образование, ќе бидат маскирани, а пред МОН ќе се изведе и перформанс под маски.
„Нашиот марш во среда нема да покаже страв од учење туку жед за знаење. За она вистинско знаење што секој од нас го заслужува. Заедно да и покажеме на оваа земја дека интелектуалната младина е оформена и независна. Нашиот дух е непокорлив, а нашиот став непоколеблив!“, велат од Средношколскиот Пленум.
Министерот за образование Абдулаќим Адеми, иако изминатава недела ги доби барањата на средношколците и вети дека ќе ги повика на разговор, сепак ги извиси. Средношколците велат дека министерот се обидува да изманипулира со нив.
„МОН во текот на изминатата недела се обиде да ги изманипулира средношколците дека ќе има средба со нивните претставници. Срамно е како министерот и неговите соработници цела недела се кријат иако ги баравме под дрво и под камен да ја договориме средбата која тие ни ја ветија на првиот марш.“ велат од Пленумот.
Собирот за средношколскиот марш ќе започне во 12 часот.
Рутата на маршот
Првито масовен средношколски марш против новиот концепт на полагањето државна матура се случи пред две недели, кога ученици до различни училишта и различна возраст ечеа низ Скопје викајќи „Ние сме иднината“ и „Не за математика“.
Освен во Скопје, средношколски марш за четврток е најавен и во Тетово. Собирно место е на платото на Културниот дом во Тетово, во 12:15 часот. Тетовските средношколци по вторпат ќе маршираат по булеварот Маршал Тито, преку ул. Јане Сандански, преку Илинденска, сè до Работничкиот Универзитет, каде што се наоѓаат канцелариите на Министерството за образование и наука (МОН), Бирото за развој на образование (БРО) и Просветниот инспекторат.
Средношколски маршеви периодов се одржаа и во Делчево, Кичево, Дебар, Куманово, Велес, Берово, Македонска Каменица, Битола, Кавадарци, Кочани, Ресен и Струга.