Основниот суд Скопје 1 денеска го одложи судското рочиште за случајот „Монструм“.
На рочиштето требаше да се сослуша заштитениот сведок заведен како Е1, но судот поради немање технички услови го одложи судењето за 11 јули.
„За пет дена ќе бидат обезбедени комплетни услови со кои ќе се скрие идентитетот на заштитениот сведок, како што предвидува законот, а на рочиштето ќе може да присуствува и јавноста“, појаснија од Кривичниот суд.
Ова е прво рочиште на кое јавноста ќе може да присуствува кога ќе се испрашува заштитен сведок. Дозволата рочиштето да се отвори за јавноста следеше откако медиумите, а и роднините на убиените момчиња и рибарот се побунија дека овој исказ не е таен, туку таен е само идентитетот на заштитениот сведок.
Родителите на убиените момчиња побараа од судијата Огнен Ставрев да има јавност во судницата и на рочиштето кога ќе се слушаат „бомбите“ за овој предмет. За ова, рече Ставрев судот дополнително ќе донесе одлука.
За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Сами Љута.
Врховниот суд во декември лани ги укина пресудите, по што судењето почна од почеток, под палката на СЈО.