На 22 ноември ќе се одржи седница на собраниската Комисија за европски прашања на чиј дневен ред е предлог законот за употреба на јазиците, во второ читање. Во оваа фаза, партиите можат да предлагаат амандмани, соопштија од Комисијата.
Расправата, според Деловникот, ќе трае три дена. Потоа законот ќе оди повторно на пленарна седница на дебата по што ќе следува финално изјаснување на пратениците по текстот.
Досега амандмани најавија од ВМРО ДПМНЕ, СДСМ и од БЕСА.
– Нашата интервенција нема да биде на целиот Закон, туку само во оние делови за кои сметаме дека се неисправни односно во деловите кои ќе го направат албанскиот јазик втор службен во државата, рече Фадиљ Зендели од БЕСА.
Томислав Тунтев од СДСМ рече дека очекува во соработка со коалициските партнери, но и со останатите пратеници во текот на амандманската расправа, да се дојде до комплетно решение што ќе биде во интерес на сите граѓани и на сите етнички заедници.
-Ние како пратеничка група или дел од неа веќе работиме на амандмански предлози што очекуваме дека ќе придонесат кон подобро и поквалитетно законско решение, рече Тунтев.
Илија Димовски од ВМРО ДПМНЕ, чија партија не гласаше за потребата од донесување на овој закон, рече дека ќе ги разгледаат сите демократски постапки во следната фаза да се отстранат слабостите во овој закон.