Првоосомничениот во предметот „Рекет“, Бојан Јовановски, денеска три часа вршеше увид во доказите во Обвинителството за организиран криминал и корупција.
Јовановски беше донесен од затворот во Шуто Оризари со полициска придружба во Обвинителството, а така и си отиде. По увидот неговиот адвокат, Сашо Дуковски, рече дека увидот ќе продолжи и следните денови.
„Не значи дека има обемен материјал и по квалитет и по квантитет, иако вршевме три часа увид. Има исказ на некој сведок, има парични средства, тоа можам да ви кажам затоа што цела Македонија и пола свет го виде, другото би се воздржал од понатамошно коментирање“ рече Дуковски.
На прашање дали има изјави од политичари во доказниот материјал, Дуковски одговори дека нема.
Тој исто така потенцираше дека на одбраната не и бил дозволен увид во записникот од сослушувањето на второосомничениот Зоран Милевски Кичеец.
-Не ни беше дозволен увид со образложение дека тоа можеме да го побараме од неговите бранители. Неразбирливо затоа што истрагата е веќе готова. Колку што знам тој се брани со молчење, но ме чуди зошто не можам да го видам тој исказ. Не дека ќе ми помогне или одмогне но не ми е јасно зошто не можам да го видам записникот на соосомничениот – рече Дуковски.