Нови 20 медицински сестри ќе бидат примени на хематолошкото одделение и за Одделот за интензивна нега на Клиниката за детски болести, изјави денеска министерот за здравство Венко Филипче. Откако во понеделникот на еден ден беше затворено хамтаолошкото одделение, министерот рече дека разговарал со директорката на Детската клиника Катерина Ставриќ, а ќе бидат обебзедени дополнителни средства од ФЗОМ за оваа цел.
„Веќе се обезбедени дел од средствата и од Детската клиника, но и екстра средства од ФЗОМ. Направивме анализа заедно со Министерството за труд и социјална политика и идентификувавме огромен број невработени сестри. Верувам дека ќе можеме да најдеме кадар кој ќе работи во овие одделенија. Хематолошкото одделение се затвори за да не дозволиме никаква импровизација додека нема доволен број луѓе“, изјави министерот Филипче.
Тие 20 медицински сестри, потенцира, се екстра од она барање за медицински сестри кое редовно го даде директорката на Детската клиника за вработување. Но, овие медицински сестри ќе бидат со договор на дело, што значи ќе бидат на товар на Клиниката бидејќи за нив нема одобрено средства од Министерството за финансии.
„Да, точно е дека ќе бидат со догодовор на дело. Но, тоа ќе ја олесни состојбата. Мора да се угасне пожарот. Првите 20 ќе потпишат договори веднаш, а за еден месец ќе побараме уште 25 нови медицински сестри. Тие нема веднаш да се ставаат да дежураат, прво ќе поминат низ обука така што се надеваме дека до летото веќе ќе бидеме во подобра кондиција“, изјави за НОВА, директорката Ставриќ.
Недостигот на лекари и медицински сестри е проблем во цела држава, во сите болници. Филипче рече дека очекуваат резултатите да им покажат каде и за која специјалност треба да се концентрираат.
Претседателката на Лекарската комора на Македонија, Калина Гривчева Старделова потенцира дека старосната граница на матичните доктори и на матичните гинеколози била 58 години. Според неа, тоа подразбира дека оваа година таа старосна граница ќе биде 59 години.
„Ако земеме предвид дека со 62 години луѓето одат во пензија, ние за три години ќе имаме проблем ако нешто не се направи во смисла тие луѓе да се стимулираат да бидат матични доктори, а не да бидат доктори во странство. Заради тоа се овие работни средби, да се најде обид луѓето да бидат мотивирани и да останат во државата. Секоја година само на Медицинскиот факултет во Скопје дипломираат 220 доктори“, изјави Гривчева Старделова.
Таа изјави дека годишно на 173 доктори на медицина им издаваат потврди за работа во странство.