Јавното обвинителство бара градоначалникот на Ново Село Боро Стојчев да одлежи две години затвор, бидејќи од 2015 бил осуден на условна казна за сторено кривично дело проневера во службата.
Кривичниот совет на струмичкиот суд веќе заседавал по барањето на Обвинителството да се активира казната, но одлуката како што изјавиле од Судот за ТВ24 ќе биде соопштена во понеделник.
Боро Стојчев во 2015 година бил осуден за кривично дело „проневера во службата“ сторено пред 8 години. Му била изречена условна затворска казна од две години, доколку не го повтори делото во следните 4 години. Со оглед дека во меѓувреме Стојчев е правосилно осуден за ново кривично дело, Јавното обвинителство смета дека треба да се активира двегодишната казна која му истекува во април идната година.
Стојчев во јули годинава со уште 4 други лица беше фатен како пренесува цигари од марката калипсо пред македонско бугарската граница. Му се судеше за кривично дело обид за пренесување непријавена стока за што од струмичкито суд доби казна од 18 месеци, но по жалба на одбраната Апелација казната му ја намали на 6 месеци.
Тој за три месеци треба да се врати на функцијата, бидејќи членот 54 од Законот за локална самоуправа, предвидува дека мандатот престанува ако лицето е осудено на казна затвор над шест месеци. Доколку не се намалеше казната затвор за Стојчев, во Ново Село требаше да се одржат нови локални избори.
Стојчев на функцијата градоначалник на Ново Село дојде на ланските локални избори како кадар на СДСМ,
СДСМ вчера го повика градоначалникот на Ново Село Боро Стојчев да си поднесе неотповиклива оставка од функцијата и најавија дека е започната е постапка за исклучување од партијата.
-Уште кога се случи тоа партијата го разреши Боро Стојчев од претседател на општинската организација на СДСМ во Ново Село, изјави пратеникот од СДСМ и коалицијата Костадин Костадинов.