На обвинетиот поранешен началник во УБК, Горан Грујевски, ќе му се суди во отсуство по четири месеци одлагање на почетокот на судењето во случајот „Трезор“, одлучи денеска Основниот суд Скопје 1.
Неговиот адвокат Петар Василев ја достави до судот одлуката со која Врховниот Суд во Атина го одбива барањето за негова екстрадиција, заверена од овластен судски преведувач.
Поранешниот началник на Петтата управа во МВР Горан Грујевски е слободен граѓанин во Грција, а според известувањето на МВР е недостапен на органите на прогонот, па сега тој и официјално е во бегство, констатираше судечкиот совет за организиран криминал во Кривичниот суд Скопје 1.
Откако обвинителот од Специјалното јавно обвинителство (СЈО) Артан Ајро, го повлече предлогот за раздвојување на постапката за Грујевски и побара да му се суди во отсуство бидејќи е во бегство, бранителот се спротивстави со образложение дека одлуката не е правосилна, односно го нема потписот на грчкиот министер за правда и се повика и на одлуката на претседателот Иванов за помилување.
„Сакам јавноста да не биде и натаму носена во заблуда. Горан Грујевски, а ни останатите обвинети во Трезор: Сашо Мијалков, Тони Јакимовски и Небојша Стајковиќ, не се аболирани во овој предмет. Во овој предмет претседателот ги помилува само сведоците, а не и обвинетите. Барам издвојување на постапката и почеток на судење во отсуство на Горан Грујевски“, рече обвинителот Ајро.
Покрај Грујевски, во „Трезор“ се обвинети и поранешниот директор на УБК Сашо Мијалков, поранешниот помошник-министер во МВР Небојша Стајковиќ и поранешниот шеф на кабинет на Мијалков, Тони Јакимовски.