Количините на различните видови инсулин што се користат за третман на дијабетес во Македонија, се во рамките на потребите и согласно препишувањата на специјалистите врз основа на Законот за здравствена заштита и Националното упатство за третман на дијабетес мелитус, кое, пак, е во целосна согласност со меѓународните упатства, одговараат од Националната комисија за дијабетес откако во јавноста повторно се актуелизира проблемот со недостиг на одредени видови инсулини.
„Наодите изнесени во изјавите на лицето што се претставува како претставник на пациентите се целосно неточни, состојбата со инсулинските количини постојано се следи и доколку има оправдано барање за нова испорака веднаш се реагира.
Сите инсулини што се користат во Македонија се од врвните светски производители и истите се во употреба во најразвиените здравствени системи во светот. Тврдењата дека инсулините што се користат во Македонија се несоодветни и неквалитетни е целосна и исклучително опасна невистина, имајќи ги во предвид големиот број лица со дијабетес тип 2 кои користат хумана инсулинска терапија и се одлично регулирани“, велат од Националната ко мисија за дијабетес.
Од таму потенцираат дека е обезбедена најсовремена инсулинска терапија за секој пациент што има потреба од соодветна комбиниција и не постои универзален инсулин што за сите би бил одличен, независно од цената на чинење. Целокупната инсулинска терапија е целосно бесплатна за сите граѓани со дијабетес, што е реткост и за најбогатите здравствени системи во Европа и светот.
„Прилагодувањето на инсулинската терапија е индивидуално и се врши за постигнување соодветна гликемиска контрола, при што кај различните пациенти се постигнува со различни инсулински третмани и дози, земајќи ги во предвид и останатите препораки до пациентите, како што се правилната исхрана, соодветната физичка активност, третманот на напоредните заболувања, итн. Постојат голем број пациенти со дијабетес тип 2 кои се лошо регулирани, а се на терапија со инсулински аналози (до 4 пати поскапи од хуманите инсулини) и кај нив е неопходно да се направи обид за постигнување добра гликемиска контрола со поинаков инсулин во интерес на здравјето на пациентите. Исто така, постојат и голем број пациенти со дијабетес тип 2 кои се на хумана инсулинска терапија и се одлично регулирани. Во дијабетесот поскапата терапија во многу случаи не значи и автоматски подобра гликемиска контрола, да беше така ќе беше многу лесно, ќе ги ставевме сите на најскапи инсулини, немаше да мора да доаѓаат на чести контроли, немаше да мораат да внимаваат на исхраната, физичката активност, другите заболувања. Но, за жал, секој што се разбира од медицина и дијабетес, знае дека не е така“, велат НКД.
Главната цел во третманот на дијабетесот кај секој пациент е постигнувањето добра гликемиска контрола. Грижата за дијабетесот на сите граѓани во Македонија и добрата гликемиска контрола остануваат највисоки приоритети, порачуваат од Националната комисија за дијабетес.
Од друга стана пациентите реагираат поради тоа што залихите на одредени типови на инсулин за март веќе се завршени.
Во Битола, во единствената инсулинска аптека од пред три дена стои известување дека инсулин од Новомиск завршил за овој месец.
Пациентите велат дека не само што нема инсулин за месец март, туку овој неопходен лек го немало и претходниот месец. Инсулинот Хималог исто така го немало цел месец.
„Секој месец има недостаток и на други инсулини , и тоа најмалку по 2-3 недели, така што пациентите се приморани за да преживеат да се префрлаат на други типови на инсулини , што резултира со тотален дисбаланс на гликемијата . Има и мали дечиња од 3 и 5 години , за кои не може навремено да обезбеди соодветна инсулинска терапија .Ова е нечовечко, се е директно загрозување на правото на пациентот , на неговото основно право на живот . Ова е најтешкиот вид на дискриминација према нас , пациентите, кои и онака сме дискриминирани со оваа тешка болест . Јас го уверувам министерот дека ваквите бирократски рестрикции не се во склад со Милениумските цели на Обединетите нации , ниту во склад со Декларацијата на СЗО(Светската Здравствена Организација) за здравјето на светсктата популација , ниту пак со Европската стратегија на СЗО , ниту со Европската стратегија за здравје и развој на децата и младите на СЗО .Овие заштеди од буџетот што ги прави министерот , со камата ќе стигнат на наплата тогаш кога за неколку години на ризичните групи на дијабетичари ќе им започнат компликациите како резултат на несредената гликемија , што нема само да ја носат личната трагедија тие самите , туку сето ова ќе има пошироки општествени и социјални импликации“, објави на својот Фејсбук профил Ели Секуловска.
Од двете здруженија „Баланс МК“ и „БУВ“ велат дека инсулинската криза трае веќе две години, а пациентите постојано с е жалат бидејќи мора да им се менува инсулинот во ситуиација кога Министерството штеди на инсулини. Не само во Битола инсулини нема и во другите градови на државата.
„Веќе две години се штеди на сметка на луѓето со дијабетес. Постојано с е кратат нарачките на аналогни инсулини за сметка на хуманите кои се поефтини и се постара генерација. Луѓето се приморани да се префралаат од еден на друг инсулин што резултира со многу негативни ефекти“, изјави за НОВА Цвете Серафимовски.