Mакедонија во мај годинава ќе биде домаќин на повеќе од 4. 000 војници од седум НАТО земји кои ќе учествуваат во најголемата воена вежба што досега се одржала на полигонот Криволак – „Swift Response 22”.
Карактеристично за оваа вежба е нејзиниот воздухопловен елемент, со користење на голем број на транспортни и борбени авиони и хеликоптери и десант на околу 1.000 падобранци.
Владата на вчерашната седница одобри влегување и престој на странски вооружени сили во земјава на повеќе од 850 воени и цивилни моторни возила, 8 авиони, 24 хеликоптери, 5 беспилотни летала, вооружување, муниција, опрема и материјално-технички средства на вооружените сили на странските држави.
– Претстојната вежба „SWIFT RESPONSE – 2022” ќе биде досега најголема меѓународна вежба во Република Северна Македонија и единствена од осамостојувањето на државата во која ке се реализираат воздушни десанти од ваков обем, со учество на повеќе од 1.000 падобрански скокови, вели потполковник Тони Јаневски, началник на Канцеларија за односи со јавност и портпарол на Генералштабот на Армијата за Нова ТВ.
Активностите на вежбата освен на Криволак ќе се изведуваат во касарната „Страшо Пинџур“ – Петровец и на Пепелиште.
На Криволак, кој се смета за еден од поголемите и подобри воени полигони, не само во регионот, туку и во Европа годинава ќе бидат изведени дури 7 меѓународни вежби, со учество на дури 5.200 припадници на повеќе сојузнички армии. На најголемата меѓу нив ќе има претставници и од армиите на САД, Обединетото Кралство, Италија, Франција, Грција, Црна Гора, Албанија.
– Вежбата „Swift Response 22” е во рамки на кампањата на вежби на НАТО „DEFENDER EUROPE 22“ кои се изведуваат секоја година на тлото на Европа и се во организација на командата на вооружените сили на САД за Европа “USAREUR-AF”, вели Јаневски.
Планирачкиот процес на оваа вежба, објаснува Јаневски, е почнат на почетокот на минатата година и досега се реализирани повеќе планирачки конференции од кои една за воздушни операции се рализира и во нашата држава.
– Армијата на Република Северна Македонија учествува со свои претставници од самиот почеток на планирачкиот процес при што во досегашниот период се преземаат сите потребни мерки и активности од страна на Министерството за одбрана за непречено спроведување на сите подготвителни активности, како и за непречена реализација на вежбата. Вежбата ќе има особено значење за нашата Армија во однос на споделување на знаења, способности и вештини, како и заради зголемување на интероперабилноста во изведување на овој вид на операции помеѓу Армијата на Република Северна Македонија и сојузничките вооружени сили, вели Јаневски.
Вежбата ќе се одржи во периодот од 10 до 16 мај година, а подготвителниот период пред вежбата и после вежбата ќе почне од 27 март и ќе трае до 31.05.2022 година.
ФОТО: Robert Fellingham/U.S. Army)+ Архива
Стојанка Митреска