Повеќе од осум милиони евра изнесува штетата која и е направена на општина Центар во рамки на проектот Скопје 2014 поради фаворизирањето на италијанските фирми кои ги лиеја спомениците, се вели во вториот извештај за проектот Скопје 2014 кој по нарачка на општината го работеа експертите Слаѓана Тасева и Драган Малиновски.
Извештајот открива дека во дури 11 тендери за 11 спомен обележја општината Центар наместо најповолните ги избрала најскапите понуди од леарниците Фондериа Фернандо Маринели и Пјетро Базанти, и двете во соптвеност на еден човек. Ова се правело на тој начин што понудите кои ги доставувале други компании, а кои биле двојно, па и тројно поефтини, се исклучувале уште на самиот старт поради разни технички грешки за кои комисијата смета дека не се прифатливи. Така, на крајот останувал само еден понудувач, односно италијанските сестрински компании кои на скопјани им лиеле споменици за многу повисоки цени.
Ревизијата утврдила дека во случајот на Италијанците, општината Центар прифаќала нивни понуди и без доставена банкарска гаранција, иако тоа е незаконски. Тие гаранциите ги доставувале подоцна, вон пропишаниот рок, а комисијата за избор во извештаите лажно вметнувала друг датум, иако датумот на гаранцијата јасно посочувал дека таа е доставена многу подоцна.
Забелешки има и кај исплатите на авторите на спомениците. Имено, општината Центар ним им ги префрлала сите средства за изработка, а не барала отчет за начинот на кој тие ги трошеле парите, па оттука, било речиси невозможно да се утврди колку пари се потрошиле на материјални трошоци, а колку на авторски хонорари.
Ова се заклучоците на ревизорите од вториот дел од извештајот за трошоците:
1.Постапката за изработка на спомениците и скулптурите е спроведена со сериозно прекршување на Законот за јавни набавки
2.Непосредното преговарање за склучување договор со авторите било спроведено на начин кој не овозможува никаква проверка на договорената цена. Поголемиот дел од прифатените пресметки на авторите се паушални, без јасна спецификација на трошоците и како такви не се подобни за евалуација. На тој начин, на авторите им биле исплатени огромни парични средства, без можност да се согледа нивната оправданост.
3. Во општина Центар немало адекватна контрола за тоа дали авторите ги изработиле и испорачале моделите, според вид и количини кои биле договорени и платени со пари на општината. Тоа резултирало со неосновани исплати на високи парични средства кон авторите и кон фирмите кои ги изработувале, односно лиеле елементите.
4. Голем дел од постапките за избор на економски оператори за лиење и изработка во мермер на спомениците и релјефите биле спроведени без да се обезбеди ниту елементарна конкуренција.
5. Општина Центар во повеќе наврати донела проблематични одлуки со кои ги елиминирала конкурентите на фирмите на Фернандо Маринели од Италија, а нему му овозможила предност и привилегирана позиција за добивање на тендерите.
6. Посочените незаконитости во постапките за јавни набавки резултираат со штета по буџетот на општина Центар во износ од околу 8 милиони евра само по основ на изработка на спомениците.
Градоначалникот Андреј Жерновски најави дека извештајот ќе го однесе во Јавното обвинителство. Во меѓувреме и Државниот завод за ревизија подготвува извештај за трошоците за Скопје 2014 во општина Центар на покана на раководството на општината.