Лидерската позиција на АТП листата не е приоритет за Рафаел Надал во 2018 година. Шпанецот, кој важи за еден од најголемите борци на терен и еден од најдобрите играчи во историјата на тенисот, порача дека нема да се бори да биде прв светски рекет на крај на година. Но, истовремено, додаде дека сака да биде среќен и да ужива во тоа што го работи, па ако тоа биде доволно за врвот тогаш и задоволството ќе биде огромно.
„Чувството дека сум мотивиран и со натпреварувачка желба за освојување на турнири ме прави среќен. Нема да се борам за првото место. Ќе се борам да одиграм сезона најдобро што можам и знам, а ако тоа значи да се вратам на врвот тогаш добро. Се борам да бидам среќен на секој турнир на кој учествувам и тоа е мојата основна цел. На крај на сезоната ќе видам до каде сум“, истакна Надал која се подготвува за настап во Акапулко каде ќе брани бодови од ланското финале во кое загуби од Сем Квери.
Роџер Федерер (36) лани имаше фантастична сезона, а во ист ритам продолжи и во оваа. Швајцарскиот ас успеа до првото место на АТП листата преку турнирот во Ротердам за што Надал вели
„Не мораше да се врати на првото место за да покаже кој е во тенисот. Тоа што го направи е многу тешко и јас можам само да му честитам. Ранг листата не лаже. Беше подобар од мене во изминатите 12 месеца. Со години бев на едно од првите две места на АТП листата, а да се биде број еден, три или пет сега нема разлика“.
Надал ја заврши 2017 година на првото место на АТП ранг листата на кое мина вкупно 167 недели во кариерата. Неговата богата колекција ја сочинуваат 16 гренслем трофеи (10 од Ролан Гарос, три од Ју-Ес опен, два од Вимблдон и една од Австралија опен), 30 од Мастерс серијата 1.000, потоа 19 од АТП серијата 500, олимписко злато од Игрите во Пекинг во 2008 година и четири со националниот тим на Шпанија во Дејвис купот (2004 година, 2008 година, 2009 година и 2011 година).