Никој од надлежните не се јавува во јавноста за да објасни дали рингишпилот кој утрово почна да се поставува на плоштадот во Скопје е дивоградба или не. Обвинувањата стигнаа од невладината организација “Плоштад Слобода” кој тврди дека во деталниот урбанистички план (ДУП) рингишпилот не постои и бараат од новиот градоначалник да на општина Центар да го дислоцира рингишпилот.
“Во последната верзија на ДУП-от на Мал Ринг рингишпилот го нема никаде. Ниту како привремен објект. Очигледно се работи за дивоградба.
-Очекуваме Жерновски да не дозволи продолжување на сулудиот проект СК2014 и да го отстрани рингишпилот што поскоро. Во овој случај не може да има „повредени“ национални чувства, непочитување на идентитетот и слични небулозни обвинувања од непостоечки организации на поддржувачи на СК2014. Ова е дивоградба и таа мора да се отстрани”, пишува во реакцијата на “Плоштад Слобода”.
Од Град Скопје кои го иницираа проектот и со дополнителни субвенции учествуваа во финансирањето на рингишпилот, велат дека не можат да одговорат дали проектот го има или го нема во ДУП-от.
“Урбанистичкиот план го носи општина Центар, ама рингишпилот го поставува ЈП “Паркови и зеленило”, ние немаме врска со тоа”, кусо за Нова изјави портпаролот на Град Скопје Неделчо Крстевски.
Баравме одговори и од ЈП Паркови и зеленило, претпријатието кое го поставува рингишпилот, а кое е под надлежност на град Скопје. Оттаму успеавме да ја добиеме само секретарката на директорот која ни рече дека никој друг освен директорот не смее да разговара со новинари бидејќи немаат портпарол.
“Директорот е многу зафатен, на состаноци е надвор, нема да се врати на работа денес, пробајте утре. Освен него нема никој друг во претпријатието кој може да ви даде одговор”, ни рече секретарката.
Недостапен е и идниот градоначалник на општина Центар Андреј Жерновски за да одговори на повикот на “Плоштад Слобода” кои од него бараат да го дислоцира рингишпилот.
Вредноста на Рингишпилот е 160 илјади евра. Најавен беше во Октомври 2012, а го изработи италијанска фирма. Се финансираше од буџетот на Град Скопје.
На овој линк погледнете го деталниот урбанистички план на “Мал Ринг”.
Во видето погледнете ги снимките од рингишпилот и реакциите на граѓаните.