Веднаш по повикот за пријавување на изборни набљудувачи на ЦИВИЛ, пристигнаа и првите апликации, но и бројни прашања од заинтересираните низ целата земја. Во овој прилог, одговараме на повеќето од тие прашања. Останатите прашања ќе бидат одговорени во текот на наредните денови.
Кога е крајниот рок за пријавување за набљудувачи?
Во тек е повик за изборни набљудувачи на претседателските и парламентарните избори 2024, со краен рок за аплицирање до 8 април, 20 часот.
На кој начин можеме да се пријавиме за изборни набљудувачи на ЦИВИЛ?
Пријавувањето е преку онлајн АПЛИКАЦИЈА.
Кој има право да се пријави на повикот за изборни набљудувачи на ЦИВИЛ?
Сите полнолетни граѓанки и граѓани на Република Северна Македонија имаат право да бидат изборни набљудувачи на ЦИВИЛ, со исклучок на претходно активно вклучени лица во изборниот процес. Членови на тимови на меѓународни или домашни набљудувачки мисии, партиски функционери и активисти вклучени во изборната кампања, кандидати на изборите и членови на телата на Државната изборна комисија (членови на ДИК, ОИК, избирачки одбори и слично) немаат право на учество на овој повик.
Сакам да аплицирам како преведувач во странска набљудувачка мисија. Дали може да бидам набљудувач и на ЦИВИЛ?
Одговорот е: НЕ. Тоа не е дозволено и се смета за судир на интереси.
Дали ќе имам време за пауза за време на набљудувањето?
ДА, СЕ РАЗБИРА. Секој од набљудувачите ќе има време за одмор. Сепак, обврска е цело време да бидете достапни.
Дали моите сознанија од теренот, додека набљудувам, можам да ги споделам на моите профили на социјалните мрежи?
Одговорот е: НЕ. Податоците што ги прибирате се исклучиво за потребите на мониторингот на ЦИВИЛ, за што ќе бидете обврзани и со договор.
Аплицирав за набљудувач на изборите во една друга институција. Дали имам право да аплицирам и во ЦИВИЛ?
ДА. Можете да аплицирате каде сакате, но ако добиете позитивен одговор од две места, ќе морате да се одлучите само за една позиција, а другата страна да ја информирате дека се повлекувате.
Кога ќе се одржат семинарите за обука на изборните набљудувачи?
Точните датуми за обука на набљудувачите сѐ уште не се прецизиран, но сигурно ќе се одржат за време на викенд. Обуките траат по 4 часа.
Јас бев набљудувач на изборите на ЦИВИЛ на претходните, предвремени парламентарни избори? Дали треба да посетувам обука?
Да. Обуките се задолжителни за сите избрани набљудувачи, без оглед на тоа дали биле набљудувачи на ЦИВИЛ и во некој од претходните изборни циклуси, дури и да се работело за претходни претседателски или парламентарни избори.
Образложението за ова е едноставно. Има измени во изборната легислатива, но и унапредување на методологиите на ЦИВИЛ.
Уште една причина за учество е и податокот дека на обуките ќе бидат потпишани и договорите за ангажман, како и познатата Повелба на набљудувачите на ЦИВИЛ, со која се обврзуваат на мобилност, посветеност и непристрасност.
Колку време трае ангажманот на краткорочните набљудувачи?
Краткорочните набљудувачи се активираат на почетокот на изборниот молк, но главните активности се на денот на гласањето. Од нив може да се побара да бидат активни и еден ден по гласањето. Во секој случај, ЦИВИЛ апелира до сите свои набљудувачи, но и членови и поддржувачи кои нема да се активираат како набљудувачи, да ѝ помогнат на својата организација да доаѓа до што е можно повеќе информации и извештаи од теренот.
Дали секој од набљудувачите ќе добие едно избирачко место за набљудување?
НЕ. Сите набљудувачи на ЦИВИЛ се мобилни, односно дека секој набљудувач има обврска да покрие во просек десет избирачки места.
Дали на денот на гласањето ќе можам да гласам?
ДА. Имено, ЦИВИЛ го промовира правото на глас како едно од фундаменталните човекови права и препорачува тоа секогаш да се искористи, без исклучок. Секој набљудувач ќе добие време во текот на денот на гласањето да го искористи своето право на глас.
Кој одлучува по апликациите?
Апликациите ги разгледува тричлена комисија при Координативниот тим на ЦИВИЛ.
Дали податоците што ги внесуваме во апликацијата се јавни?
НЕ. Тие се чуваат во најстрога тајност.
Јас немам компјутер, како да аплицирам?
Аплицирањето е лесно. Тоа можете да го направите и од мобилен телефон. Пополнувањето на апликацијата трае само неколку минути.
Би сакала редовно да се информирам за активностите на организацијата. Како?
Ништо полесно од тоа. Следете нѐ на Фејсбук, Х (поранешен Твитер) и Инстаграм.
Како да ве контактирам?
Доколку имате прашања и сугестии, не се двоумете да се јавите на 02 / 520 91 76, секој ден од 10 до 14 часот или напишете порака на нашата ФБ страница или мејл: civil@civil.org.mk.
ЦИВИЛ Тим за комуникации