По повод Меѓународниот ден на жената на 8 Март, Kанцеларијата за статистика на Европската Унија “Еуростат”објавува избор на податоците за жените во вработувањето и усогласување на работата и семејниот живот.
Според статистиката на Еуростат, најлесно е да се биде мајка и вработен во исто време во Холандија поради фактот дека процентуално речиси сите мајки работат со скратено работно време. А ако се гледаат овие параметри, најтешко е во Македонија која од сите европски земји има најмал процент на мајки кои работат со скратено или флексибилно работно време.
Дури 81 проценти од жените во Холандија кои имаат едно дете помладо од 6 години работата со скратено работно време или вообичаено по три дена во неделата. Вака работи и висок 91 процент од жените кои имаат три или повеќе деца. Втора е Австрија со 60% за оние со едно и 69% за оние со по три и повеќе деца.
Македонија е на дното на листата каде бројот на мајки со едно дете кои можат да работат со скратено работно време изнесува 4.4 проценти и 3.1 процент на жените со по три и повеќе деца.
Највисок процент на жени менаџери има во Латвија (45%), Унгарија (41%) и Франција(40%), а најнизок во Кипар (15%), Грција (23%) и Малта (24%).
Жените доминираат во професијата наставник или 85 проценти од наставниците во основното образование се жени. Овој процент е највисок во Чешка и Словенија (и во двете 97%), додека во високото образование се помалку застапени, а бројот на жени професори и истражувачи опаѓа.
Во 2011 процентот на жени во академското образование е 40 проценти. Највисоките проценти има во Латвија (59%), Литванија (55%) и Финска (50%), а најниско е учеството во Малта (30%). Во Македонија процентот на жени во високото образование изнесува 47 проценти.
Балтичките земји водат и во застапеноста на жени доктори, иако бројот е во опаѓање. Во 2010 година 45% од лекарите во ЕУ земјите се жени, во споредба со 38% во 2001 година.
Највисоко е учеството во Естонија и Латвија (и во двете со 74%), Литванија (70%) и Романија (69%), а најниска во Луксембург (30% во 2011 година). Во Македонија учеството е 59%.