Основното јавно обвинителство Скопје (ОЈО Скопје) денеска соопшти дека напаѓачитена Никола Саздовски член на навивачката група „Комити“ ќе одговараат за кривично дело „Убиство на свиреп начин“.

„По преземање на сите дејствија за утврдување на фактите во предметот против трите лица осомничени за кривичното дело извршено на 29 јуни 2018 година при кое почина лицето Н.С., изврши преквалификација на кривичното дело за кое до сега се водеше истражната постапка“, соопштија денеска од ОЈО Скопје.

Ваквата одлука на јавниот обвинител следи откако во текот на истражната постапка беа сослушани двајца од тројцата уапсени напаѓачи, беа испитани сите сведоци што можеше да ги обезбеди полицијата како и по доставувањето на резултатите од обдукцијата од страна на Институтот за судска медицина и изготвеното судско-медицинско вештачење.

„Ова вештачење беше доставено во обвинителството на 16 јули 2018 година и од него неспорно произлегува динамиката на кривично-правниот настан во смисла на видот и карактерот на здобиените повреди кај лицето Н.С., а се утврдува и причинско-последичната врска на нанесените повреди и нивното влијание на смртниот исход. Одлуката за преквалификација на кривичното дело можеше да се донесе само откако јавното обвинителство ги обезбеди сите релевантни докази, меѓу кои и судско медицинското вештачење, и откако ги утврди фактите кои произлегуваат од тие докази“, велат од ОЈО Скопје.

Од таму уште информираат дека истражната постапка против тројцата осомничени ќе продолжи за кривичното дело убиство сторено на свиреп начин.

Пред да биде донесена одлуката на јавниот обвинител, двајцата осомничени кои се наоѓаат во притвор во Затворот Скопје ќе бидат доведени пред надлежен јавен обвинител за да дадат своја одбрана за новото кривично дело за кое се осомничени. Воедно, надлежен јавен обвинител во текот на истражната постапка, продолжува да презема и други истражни дејствија, меѓу кои ќе издаде и наредба за медицинско психијатриско вештачење на двајцата осомничени.

За третиот осомничен кој се’ уште е недостапен ќе биде распишана домашна и меѓународна потерница.

Имено, наместо за кривично дело „Насилство“ од член 386 став 6 во врска со став 3 во врска со став 1 од Кривичниот законик, против тројцата осомничени ќе се води истражна постапка за кривично дело „Убиство извршено на свиреп начин“ од член 123 став 2 точка 1 од Кривичниот законик.

За ова кривично дело е предвидена казна затвор од најмалку десет години или максималната казна доживотен затвор.

Веднаш по нападот врз Никола Саздовски, Секторот за внатрешни работи Скопје поднесе кривична пријава против тројца осомничени за кривично дело „Насилство“ повикувајќи се и на членови на Кривичниот законик во кои беше предвидена и отежителната околност тешка телесна повреда.

По смртта на Саздовски, навивачката група „Комити“ организраше протестен марш на кој побараа „правда за Саздо“ и „казна за сторителите“.

Никола Саздовски беше претепан од тројца скопјани на 29 јуни и по десет дена поминати во кома почина на една од скопските клиники.