Домашното млеко е сигурно и безбедно за употреба – резултатите од преку 20 испитани мостри од средата до сега, покажале дека концентрацијата на афлатоксин М1 секаде е под ризичното ниво.
„Македонските граѓани слободно нека го конзумираат македонското млеко, испитани се мостри на Битолска млекара, Алпи-Тетово, Здравје Радово, Струмичка млекара, Бучен Козјак и други млекари“, изјави Дејан Рунтевски, директор на Агенцијата за храна и ветеринарство.
Тој вели дека освен млекото биле испитани и мостри од млечни производи, кашкавал, сирење и слично.
Анализи ќе бидат направени уште на 15 домашни млека.
Агенцијата информираше денеска, дека од увозните млека зголемено присуство на афлатоксин било пронајдено во неколку прaтки на Имлек, Алпско, Маестро Ниш и една пратка на Винџија.
Овие пратки се чуваат во магацин – ќе бидат уништени или вратени во земјите каде што доаѓаат.
Увезените млека со спорен датум се повлечени од рафтовите во маркетите. Во петокот е донесена наредба за јавно ветеринарство и здравје со која секој произвидител е должен да го испита присуството на афлатоксин, со што ќе гарантира дека неговото млеко е исправно.
Од Агенцијата за храна тврдат дека методата со која се испитува присуството на афлатоксин е акредитирана и нема потреба примероците да се праќаат на супер анализа во странство.