Родители чии деца одат во градинката “Наум Наумовски- Борче” позади Универзалната сала веќе цела година молат да се дислоцираат контејнерите кои се залепени до оградата на градинката и од кои ѓубрето секојдневно се излева во дворот.
Пишувале писма и барале средби и со Општина Центар и со Град Скопје и со ЈП Комуналец, но велат дека засега немало фајде од ништо бидејќи надлежните постојано си ја префрлале вината едни на други.
“Сега се затоплува и децата си играат во дворот. Ѓубрето паѓа директно во дворот. Лично го видов моето дете есента како си игра на земјата на која имаше куп употребени женски влошки паднати од контејнерите”, вели родител на едно од децата.
“Секаде се обраќаме и пак ништо. Ако не можат да се дислоцираат барем да го собираат редовно ѓубрето. Сами моравме да плаќаме за соберат паднат контејнер од кој директно ѓубриштето паѓаше во дворот каде што играа дечињата”, се жалат родителите.
Екипата на Нова беше на терен и се увери дека старите контејнери без капаци се залепени до самата ограда на градинката, а од другата страна се лулашките на кои децата си играат во топлите денови. Во видеото погледнете ги снимките и изјавите на родителите.