Прилепчанецот кој вчера се обидел да ја убие неговата поранешна сопруга и тоа среде бел ден, во домот на нејзините родители, уште во јануари годинава бил пријавен за семејно насилство. Тогаш било разговарано со жртвата, но таа не сакала да се поведе постапка пред Основен суд за изрекување на привремени мерки за заштита, за што има своерачна потпишана изјава, потврдуваат за НоваТВ од Центарот за социјални работи во Прилеп.
Одбивањето на оваа мерка вчера можеше прескапо да ја чини оваа 43-годишна жена, дури и живот – таа вчера едвај успеала да ги преживее нападите од поранешниот сопруг кој најпрвин започнал да ја дави и да ја удира со тупаници по главата и по телото. Нејзината мајка се обидела да го оттргне, но насилниот човек ја турнал, извадил нож и на поранешната сопруга ѝ нанел неколку рани во телото и ногата. Жената ја спасиле тројца соседи кои успеале да го изнесат надвор насилникот.
Животот на напаствуваната жена висел на конец, а семејната драма продолжила во болничките ходници, каде нејзините родители се молеле да биде спасен животот на нивната ќерка.
Очевидец на драмата во болницата раскажува дека од блиски роднини слушнале дека насилникот претходно ја запалил и нивната семејна куќа, а по вербалното и физичкото насилство, жената избегала кај родителите.
И на насилникот вчера му била укажана помош во болницата, тој наводно се обидел да си го одземе животот сечејќи ги вените, а двете раце му биле со преврска.
За тоа дали можело да се спречи ваквиот за малку фатален исход за жртвата, дали насилникот бил пријавен и дали стручните лица реагирале, раководителката на Меѓуопштинскиот Центар за социјални работи во Прилеп, Јасминка Митреска, за НоваТВ денеска изјави дека случајот го следат од јануари и дека преземаат чекори да ја заштитат несреќната жена.
„Во ЈУМЦР Прилеп има пријавено семејно насилство во јануари 2022 кога е извршен разговор но жртвата не сакала да се поведе постапка пред Основен суд за изрекување на привремени мерки за заштита, за што има своерачна потпишана изјава. За настанот од завчера (20.06.2022 година) ги преземаме потребните активности, односно ја посетивме жртвата која е хоспитализирана во Општа болница ‘Борка Талески’ и разговаравме со неа. Исто така, тимот изврши посета и во семејниот дом и ги презеде потребните мерки за заштита од семејно насилство, согласно Законот за превенција и заштита од семејно насилство, односно поднесен е предлог до Основен суд Прилеп за изрекување на привремени мерки за заштита од семејно насилство“, вели Митреска.
Од Центарот тврдат дека и понатаму ќе ја следат состојбата и ќе ги преземаат сите потребни мерки и активности согласно Законот и потсетуваат дека оваа установа има дежурен телефон кој што е достапен во текот на 24 часа.
Во прилепскиот Центар за социјални работи во текoт на оваа година, од јануари до мај се примени дури 81 пријава за семејно насилство, а во минатата година имало повеќе од 200.
Јавен обвинител до судијата на претходна постапка достави предлог за определување мерка притвор за осомничениот, оценувајќи дека постои опасност тој да избега, да влијае врз сведоците и оштетените или да го реализира обиденото кривично дело. Судијата го прифати предлогот и на осомничениот му определи притвор во траење од 30 дена.
Љубица Балабан