Наставничкиот пленум изразува незадоволство во врска со најавите за зголемување на платите на просветните работници за 5 %, што би требало да се случат од септември годинава, како што објави министерот за финансии во презентацијата на Предлог-буџетот за 2018 г.
-Платите на просветните работници во Р Македонија се едни од најниските во регионот. Дополнително, наставниците не добиваат надоместоци за својата прекувремена работа која не ретко се одвива и за време на викенд, па оттука највеното зголемување за 5 % ниту ќе придонесе за поголема мотивираност на наставниците, а со тоа и подобрување на квалитетот на наставниот процес ниту суштински ќе го подобри животниот стандард на таргетираните, се вели во соопштението.
Наставничкиот пленум понатаму во писмото истакнува уште една забелешка: За разлика од привилегираните административци кои добиваат месечен надомест за патни трошоци, голем дел од нив астрономски суми, овие трошоци од 2010 година се вкалкулирани во бруто платата на просветните работници, а со тоа наставниците (особено оние кои поминуваат повеќе километри до своето работно место) се дискриминирани во поглед на реалните примања.
Наставничкиот пленум очекува од Владата објаснување зошто не се спроведуваат членовите 35, 36 и 37 од Колективниот договор потпишан на 2 декември, 2008 и изменетиот договор од 28 ноември, 2009 г.
-Доколку буџетот е празен, советуваме мерките за штедење да се остварат преку редукција на гломазната администрација во сектори каде реално нема потреба од толкав број административци, а не преку грбот на секторот образование каде училиштата сѐ уште сe соочуваат со недостаток на стручни кадри: педагози, психолози, дефектолози и други стручни лица. Во спротивно, оваа најава ќе ја сметаме за навредлива и популистичка мерка на Владата на РМ со која се обидува да се дотолчи и онака прегазеното достоинство на просветните работници во земјава, велат од Пленумот.
Наставничкиот пленум на крајот од писмото истакнува дека во знак на солидарност, доколку во Буџетот нема средства за соодветно вреднување на трудот на наставниците,тие се откажуваат од покачувањето од 5% и предлагаат тие средства да се насочат кон реални социјални програми, но истовремено бара и другите корисници на буџетските средства да го следат нивниот пример.