Шефовите на НАТО дипломатиите имаат доверба во македонскиот институционален судски систем, изјави денес висок дипломат на Алијансата на маргините на средбата на НАТО министрите за надворешни работи во Брисел.
Во одговорот на новинарско прашање за бегството на Никола Груевски во Унгарија, дипломатот рече дека на министерската маса денес во НАТО имало дискусија за реформите за владеењето на правото во нашата земја. Според овој извор, тие реформи добро напредуваат и сите НАТО министри имаат доверба во институциите што ја истражуваат корупцијата на високи функционери.
НАТО денес испрати силна поддршка до Македонија и од земјата чека финализирање и примена на Договорот од Преспа, изјави дипломатот.
Според него, поддршката дошла од сите членки на НАТО. И од грчкиот министер кој изјавил дека треба да се поздрави храброста на Скопје и Атина во овој процес.
Според друг НАТО извор, денес во Брисел, на министерската дебата за Западниот Балкан, Македонија била добрата вест.
Нашиот министер за надворешни работи Никола Димитров беше исто така во Брисел каде што се сретнал со повеќе свои европски колеги од кои ја добил поддршката за влезот на Македонија во НАТО и поддршка за брза финализација на Договорот од Преспа.
Димитров потсети дека Македонија е кандидат за членство во НАТО од 1993 година кога, преку Декларцијата на Собранието, Македонија кажа дека сака во НАТО.
-Требаше да влеземе во 2008 година. Поминаа 10 години и конечно го остранивме проблемот со Атина. Ова е важно и за Македонија, но и за Алијансата и за регионот. Со тоа се проширува географијата на која има повеќе стабилност и предвидливост. За нас НАТО членството значи дека Македонија е тука за да остане во овие граници, изјави Димитров.
Алијансата очекува дека Преспанскиот договор ќе биде комплетиран кон средината на јануари. Потоа процесот на зачленување минува во Алијансата на потпишување на Придружниот договор. НАТО очекува дека Македонија ќе стане полноправна членка на пролет 2020 година.
Во меѓувреме, ќе почне процесот на ратификација во земјите членки на НАТО кој ќе трае 12 до 14 месеци.
Истовремено, во овој период, Македонија треба да поднесе програма за реформи и да ја спроведе за време на процесот на ратификација.