Северно-атлантскиот совет на лидерите на 29 земји членки денес ќе усвојат заклучок со покана за преговори за членство со Македонија. Нацрт-заклучокот што треба да биде усвоен денес предвидува успешен референдум за Договорот со Грција за да може поканата да се реализира.
-Во 2008 одлучивме дека НАТО ќе и додели покана на поранешната југословенска Република Македонија за влез во Алијансата штом се изнајде заеднички прифатливо решение за името во рамките на Обединетите Нации. Го поздравуваме историскиот договор помеѓу Атина и Скопје за решение за спорот за името. Во согласност со нашата политика решивме да ја поканиме владата во Скопје да започне преговори со Алијансата. Целосна имплементација на сите предвидени внатрешни процедури во однос на договорот за решение на спорот за името е услов за успешно заокружување на пристапниот процес, стои во нацрт заклучоците.
НАТО лидерите го поздравуваат и договорот со Бугарија.
-Ги поздравуваме напорите на Владата во последната година и значајниот напредок што е постигнат за одредени итни реформски приоритети и охрабруваме дополнителни реформи за да се зајакне придонесот кон Алијансата. НАТО ги поздравува и напорите за градење мултиетничко општество и повикува на дополнителни напори во таа област. НАТО го поздравува и македонскиот придонес во неговите мисии и меѓународната безбедност, вели нацртот на заклучоците.
Состанокот на лидерите ќе започна во 14 часот и ќе трае три часа. Македонија е на крајот на дневниот ред. Дипломатски извори во НАТО велат дека не се очекува никаков проблем за усвојување на овој заклучок.