Дополнителниот заменик-министер за финансии, Кире Наумов, во врска со вчерашното задолжување на Владата на домашниот пазар со 15,5 милиони евра, денеска предупреди дека со вакво темпо на задолжување,планираниот дефицит за целата 2016 година ќе биде реализиран во мај.
– Министерот Ставрески на 24.11.2015 година јасно кажа дека со четвртата еврообврзница се обезбедени средства за непречено извршување на обврските на Буџетот за 2016 година. Само со вчерашната аукција на државни хартии од вредност, Груевски и Ставрески ги задолжија граѓаните на Македонија со нови 15.5 милиони евра нето долг. Односно, само со првото задолжување во 2016 се реализираше 5% од планираниот дефицит за целата 2016 година. Во првите шест месеци од оваа година Ставрески има закажано уште 23 аукции на државни хартии од вредност. Со вакво темпо на задолжување веќе во месец мај планираниот дефицит за целата 2016 година ќе биде реализиран, се наведува во соопштението.
Наумов уште вели дека има впечаток дека во јавноста во последните месеци темата за задолжувањето „почнува да се претставува како лична битка помеѓу Наумов и двоецот Груевски-Ставрески, односно, еве Владата на ВМРО – ДПМНЕ ветува и бара средства за проекти, а СДСМ дури и исплатата на тековните обврски се обидува да ја закочи“.
– Ниту првото, ниту второто не е точно. Во Република Македонија постојат закони. За жал некој ги смета за палома хартии. Граѓаните треба да останат и во иднина да живеат на ова поднебје. Никој не смее да го злоупотребува правото на потпис, за да ја отпише иднината на младите. Очигледно е дека Груевски и Ставрески се водат од девизата ПОСЛЕ НАС ПОТОП, се вели во соопштението од Наумов, при што се наведува дека сето ова се случува во пресрет на одлуката на Управниот Суд, „во чии раце е одговорноста дали ова сценарио ќе продолжи да се остварува“.