Почнувајќи од 2008, само за 5 години, владата на ВМРО – ДПМНЕ го дуплираше јавниот долг. Груевски и Ставревски потпишуваат документи со кои секоја година не задолжуваат просечно по 270 милиони евра, изјави Кире Наумов, претседател на Советот за економски прашања на СДСМ.
Според него само во време траењето на неговата прес-конференција веќе сме задолжени за нови 1.500 евра. Кога ќе си легнете вечер бидете сигурни дека денот завршил така што имаме поголем долг за 750 илјади евра, затоа што за толку просечно секој ден Груевски зема кредит на име на сите граѓани, рече Наумов.
„Владата ниту во еден момент не помислува да му помогне на стопанството и овие средства да ги остави кај банките и другите инвеститори. Затоа таа денес веднаш емитува хартии во вредност за истата сума, односно за 5 милијарди денари. Останува до крајот на денот да видиме само колкава нов долг, колкава сума над 80 милиони евра ќе бидат прибрани од банките и другите клиенти“, истакна Наумов.
Според податоци од министерството за финансии, во месец октомври, владата на ВМРО – ДПМНЕ, креирала буџетски дефицит од нови 22 милиони евра. Со тоа, до октомври, владата остварила вкупен буџетски дефицит од цели 279 милиони евра.
– Секој месец од оваа година владата троши по 30 милиони евра повеќе од тоа што таа успева да го собере во буџетот преку даноци, такси, казни и други приходи. Ако говориме со речникот на ВМРО – ДПМНЕ, ова покажува дека секој месец на владата и недостасуваат по 30 милиони евра за да може да ги исплати платите, пензиите, субвенциите, социјалните трансфери.
– Но, јавниот долг заклучно со октомври е за скоро 170 милиони евра повисок од вкупните приходи кои владата планира да ги собере со буџетот во 2014 година. Тоа значи дека владата не задолжила за повеќе од едногодишната вредност на платите, пензиите, социјалните трансфери, субвенциите,капитални инвестиции. За да се врати овој долг, една година државата треба да не троши ништо, да живее од воздух и повторно на крајот да останеме должни, рече Наумов.